Logotipo.png
Aranduka oñe’ẽva Guaná rehe oñeguenohẽta ko arapópe
Publicado: 02/26/19 01:15:p. m.

Paraguái Ñe’ẽnguéra Sãmbyhyha (PÑS) ha Centro de Estudios Antropológicos de la Universidad Católica (CEADUC) oguenohẽta ko arapo 28 oúvape aranduka hérava “Guaná. Una breve descripción”, ohesa’ỹijóva ko ypykuéra aty rembiasa, mba’éichapa oiko ko’ág̃a hikuái ha avei iñe’ẽnguéra tee reko ko’ag̃agua.

Ko aranduka oñeguenohẽta ko arapo 28 jasykõi oúvape 10:30 aravo jave, koty hérava Salón Multiuso, Instituto Superior de Educación (ISE) peguápe, opytáva Avda. Eusebio Ayala km 4/5-pe, Paraguay távape. Oñe’ẽta ko aranduka rehe PÑ sãmbyhyhára, Ladislaa Alcaraz de Silvero, CEADUC moakãhára, Nilo Zárate, ha omoakãva Guaná aty, Miguel Cuéllar.

Ko aranduka omono’õ mbykyha guivo ko ypykuéra aty rembiasa ha upeva’erã oñemoñe’ẽ heta aranduka hesegua; oñe’ẽ avei hekokuéra ko’ag̃agua rehe; tembipuru ojeipyahava’ekue oñemono’õ hag̃ua marandu ojeporekáva heko ha iñe’ẽnguéra rehe, ha ãva ñembyapu’a rehe avei.

Ko’ã marandu niko tuicha ikatu oipytyvõ umi oñemoarandu ha ojetypekávape, avei ojeykeko hag̃ua ypykuérape oñemombareve jey hag̃ua iñe’ẽ teekuéra ha upéicha oikove are hag̃ua ko ava aty, iñarandupy rypy’ũva ha péina ko’ág̃a ojehekojopývahína oikégui hekohapekuéra ambue mba’e ha omohendaguégui hikuái iñe’ẽ tee.

PÑS, ypykuéra aty Río Apa (Guaná) ndive, oipykúi upe 2013 guivéma jahechápa noñeñongatúi, noñemombaretejeýi ha ndojeikuaaukái ko Guaná ñe’ẽ, ikangy nungaitéva hína.

Ko Guaná aty oĩ San Lázaro-pe, Concepción Tavusúpe. Peteĩva umi 19 ypykuéra aty, oikovéva Paraguáipe, apytépe.

Tetã aty ONU he’i 2019 ha’eha “Año Internacional de las Lenguas Indígenas” ha péva rupive tove tajahechakuaave heta ypykuéra ñe’ẽ ogueha ohóvo ha tekotevẽtereiha oñeñongatu ko’ãva, oñemombarete jey ha ojeikuaauka ha toñemba’apo pyha’e herapekuéra tetãpýre ha yvy’ape tuichakue.


Compartir esta noticia

Últimas Noticias Publicadas