Logotipo.png
GUANÁ-KUÉRA OHECHAUKÁTA MBA’ÉICHAPA OÑEHA’Ã OMOMBARETE JEY IÑE’ẼTEEKUÉRA
Publicado: 11/22/17 11:27:a. m.

Peteĩ aty guasúpe hérava “El pueblo guaná levanta su voz, siente y habla al Paraguay” ojehechaukáta opa mba’e ojejapómava oñemombarete jey ko ypykuéra ñe’ẽ, ikangyvevahína Paraguáipe. Ko aty guasu oikóta ko arapo oúvape 23 jasypateĩme, 18:00 aravóramo, “Plaza del Folklore”-pe, opytáva Vallemí távape, Concepción Tavusúpe.

Ko aty ombosako’ihína Paraguái Ñe’ẽnguéra Sãmbyhyha, Municipalidad de San Lázaro ha Guaná aty, hérava Río Apa. Omoakãta PÑ Sãmbyhyhára, Ladislaa Alcaraz de Silvero, ha omoirũta chupe mburuvicha ambueve mburuvicha.

Ojapópa irundy ary PÑS omba’apohague oúvo Guaná Aty Río Apa ndive oñongatu ha omombarete jeývo iñe’ẽnguéra. Ko aty guasu rupive ojekuaaukáta mayma Paraguaiguápe ko’ã ypykuéra reko ha mba’éichapa oñeha’ãhína omombarete jey iñe’ẽ.

Ko atýpe ojehechaukáta avei mitã ha mitãrusu, ko Guaná Aty pegua, ñoha’anga rupive mba’éichapa oiporu jey hikuái iñe’ẽ teekuéra.

Ko comunidad indígena Río Apa opyta San Lázaro, tavusu Concepción pe, 8 kilómetros táva Vallemí gui.

Umi Guaná oikóva ko tekohápe ndohasái 100 tapicha; hákatu, oĩ avei ambue tekoha ojehe’amahápe hikuái ambue indígena ndive: Machete Vaina, Km. 39, Km 40, Castilla ha Riacho Mosquito pe.

Ko’ã guaná, Kaskiha heropýva ymaite guive, oĩ familia lingüística Enlhet Enelhet térã Maskoy ryepýpe, itenonde umi ojapyhyvéva arandupy ambue ha iñe’ẽnguéra ikatu omano.


Compartir esta noticia

Últimas Noticias Publicadas