Logotipo.png
Heta tapicha ijaty ha oñomongeta ypykuéra ñe’ẽ rehe amandaje guasúpe
Publicado: 07/05/18 02:56:p. m.

Mbohapy ára pukukue, ñomongeta, ñombohovake rypy’ũ ha arandupy jehesa’ỹijo rire, oñemohu’ã ko arapópe Seminario Internacional “Empoderamiento de los hablantes de la lengua local, de las comunidades y de las naciones. Ñañemomba’e ñane ñe’ẽnguéra rehe, tahekokatu arapýre” Ojehechaukahaguépe ojehupytýmava ha ojejapokuaáva ñe’ẽnguéra rehe oñemba’apóvo oñesẽ hag̃ua tenonde gotyo ha omba’apo joaju porãve hag̃ua mayma América Latina ha Caribe retã.

Heta mba’e ohesa’ỹijo ko’ã ára ryepýpe heta tapicha arandu tetã ambue ha Paraguaigua, ha hyepýpe oñombohovake mba’eichaitépa oĩ ñe’ẽnguéra Latinoamérica ha Caribe ryepýpe; mba’éichapa ko’a guive oñepytyvõkuaa oñemoañete hag̃ua opa tetã ñe’ẽme’ẽnguéra; ha opa umi ojejapo porãva oñemombarete hag̃ua ypykuéra ñe’ẽnguéra.

Ko amandaje guasúpe ojehesa’ỹijo ojoja mbohapy kotýpe ha umívape oñeñe’ẽ ko región rembiaporã rape oñemomorãvo ág̃a 2019 pukukue ypykuéra ñe’ẽ ary yvy’ape tuichakue; mba’éichapa ojejapokuaa ojeguerojera hag̃ua Red/Plataforma ko región-pe; ha avei mba’éichapa ojejapokuaa Atlas Regional de Lenguas.

Tapicha arandu ohesa’ỹijo mba’ekuaapy. Tenonderãite oĩ Paraguái Ñe’ẽnguéra Sãmbyhyhára, Ladislaa Alcaraz de Silvero ha ha’e oñe’ẽ “Paraguay, un país multicultural, multilingüe y multiétnico. Acciones desde el Estado” rehe. Karai Alexey Tsykare, Miembro del Comité Directivo IY 2019, ha’e ohesa’ỹijo “Equidad lingüística. Posicionamiento de las lenguas locales”. Ha karai Domingo Aguilera, Ñe’ẽ Rapereka Moakãharapavẽ PÑS-pe, ohesa’ỹjo “Desplazamiento lingüístico-cultural por migración”.

Oñemono’õmba rire opa umi ojehesa’ỹijo ha oñembohovakeva’ekue mayma tapicha tetãygua ha ambueguáva jepytyvõme ha avei opaita tapicha oĩva guive ko atýpe rupive, PÑ Sãmbyhyhára oikuaauka mbykyha guivo opávo ko Amandaje opa umi mba’e osẽ va’ekue atýgui.

Hatã ojejepy’amongeta tuicha mba’eha ojehechakuaáramo ñe’ẽ ha’eha mba’e guasu mayma tapichápe, oñemba’apóvo Estado guive ñe’ẽnguéra rehe. Avei, oje’e tekotevẽha ojeguerochichĩve mayma umi ñe’ẽ ikangy térã ojehechag̃ivéva ha toñembohape chupe hesãi ha oikove akói hag̃ua.

Oje’e ojeykeko kyre’ỹtaha upe ypykuéra ñe’ẽnguéra ary jeguerohory yvy’ape tuichakue, ha oñemba’apóta peteĩ kuatia ári ko región guive, oikotevẽtava iviru teére oñeikotevẽtaháicha.

Tove tojeykeko kyre’ỹ atlas lingüístico mundial apo, omoakãtava UNESCO. Estado-kuéra guive toñembohape joajúpe oñemombarete ha ojeguerojera hag̃ua ypykuéra ñe’ẽ, ko’ýte umi ikangýva.

Toñemombarete arandupyita ha ñe’ẽkõime jehekombo’e ha toñembohape tekombo’e ambue hendáicha mayma ypykuéra ndive. Toñemyatyrõ leikuéra opa ko región retãme, ojehechakuaávo umi tetã oguerekómava hendapete.

Tojeguerojera tenda ombohapétava jepuru meme ha hekópe opa umi ypykuéra ñe’ẽ. Toñemoneĩ ojepuru kyre’ỹ ha itenonde hag̃ua opaite América ñe’ẽ oñemba’apóvo Estado guive; oñemboyke’ỹre mayma ambue tetã ñe’ẽ. Ha tojeguerojera tembipurupyahu rupive oguerojera ha omoasãikuaátava ñe’ẽnguéra ciberespacio rupive.

Ko amandaje guasu niko ombosako’i heta temimoĩmby: Tetãnguéra Jokupytyrã Motenondeha, UNESCO rovake Delegación Permanente de Paraguay guive, ha Dirección de Organismos Internacionales; Tekombo’e ha Tembikuaa Motenondeha, Dirección General de Cooperación-CNC UNESCO Paraguay ha Comisión Nacional de Bilingüismo guive; Paraguái Ñe’ẽnguéra Sãmbyhyha; Tetã Arandupy Sãmbyhyha; Tetãpy Jehechauka Sãmbyhyha y SENATICS. Itaipú Binacional omboviru ko Amandaje ñembosako’i.

Ko amandaje guasu oiko Crowne Plaza Hotel, Paraguaýpe, ha oñeime kuri tetã Brasil, Bolivia, México, Perú, Ecuador, Paraguay, Rusia, Estados Unidos ha Italia-gua.


Compartir esta noticia

Últimas Noticias Publicadas