Logotipo.png
HETAVE OĨ TAPICHA HÉRA GUARANÍVA
Publicado: 11/09/17 11:19:a. m.

Peteĩ tembiapo rupive, ogueroguatava’ekue Paraguái Ñe’ẽnguéra Sãmbyhyha, Ñe’ẽ Rapereka Moakãhapavẽ guive, ojehechauka mba’éichapa ojeporuve guarani oñembohéra hag̃ua tapichápe, Registro Civil-pe. Oĩ téra hetaitereíma ojeporúva, techapyrã ramo Arami, 12.787 tapicha héra péicha ñane retãme.

Dirección General de Registro del Estado Civil (DGREC) kuatia ñongatupy 2014 ary peve ohechauka ko’ã pa téra guaraníme hetave ojeporúva ñane retãme: -Arami [12.787]; -Ka’akupe [251]; -Jeruti [218]; -Anai [146]; -Ysapy [136]; -Amambái [130]; -Jára [121]; -Ára [94]; -Panambi [79]; y -Pacholi [58].

Ko DGREC kuatia ohechauka ojupiha ohóvo terakuéra guaraníme jeporu ñane retãme. He’ise, sy ha túva oiporavove ko’ág̃a rupi, iñemoñarépe herarã guaraníme, oñe’ẽ térã oñe’ẽime hikuái guaraníme.

Ko tembiapo rupive oñekuave’ẽ terakuéra rysýi guaraníme, mba’éichapa ijehai porã ha mba’e mba’épa he’ise. Vokoiete ojejuhúta PÑS página web-pe: www.spl.gov.py.

Ko tembiapo oporomomarandupaite terakuéra guaraníme ojeporúmava ñane retãme rehegua, ohechaukáva ñandéve DGREC kuatia ñongatupy.

Umi ñe’ẽ ojeporúva téraramo, guaraníme ojeporu oñembohéra hag̃ua opamba’e jahecháva ñande jerépe, yvyra, tymba, mbyjakuéra, ha ambueve oĩva ñane mba’ererovia térã Ñandejára rehegua mba’ekuaápe.

Ambue mba’e jahechakuaáva oĩma avei téra guarani pytagua retãme, techapyrãramo ja’ekuaa México, imombyryetemíva Paraguáigui. Purahéi ha ñoha’ãngahára México-gua Anahí Giovanna Puente Portillo, hi’arareñóiva táva México-pe 1983-ramo, ojekuaáva ichupe tetã ambuére hembiapo porãite rupi, ohechauka techapyrãramo opavavépe mba’éichapa oñemomba’e téra guarani rehe mombyrygua, ambue tetã América-gua.

PÑS ohechaporã ko guaraníme hetave terakuéra, ko’ýte oiporúre mitã pyahuve; he’iséva ou porãha avei ko ñe’ẽme ha upévare ko’ýte oñemba’apo kyre’ỹvéta ko temimoĩmby guive tovéma tojeporu opa rupi ha opa mba’erã ko Paraguái ñe’ẽtee.


Compartir esta noticia

Últimas Noticias Publicadas