Logotipo.png
INC mba’apoharakuéra oñembokatupyry guarani ñe’ẽme
Publicado: 02/27/19 12:44:p. m.

Ko ararundýpe oñepyrũ guarani jehekombo’e umi Industria Nacional de Cemento (INC)-pe g̃uarã. Péicha oñeñeha’ã oñembokatupyryve ko’ã tetã mba’apohárape guarani jeporúpe, oñe’ẽ ha ohaikuévo, ha’e rupi avei ñane retã ñe’ẽ tee, oñeñangareko hekopeve hag̃ua tetãyguarakérare.

Oporohekombo’éta guaraníme oĩva INC Unidad de Asuntos Lingüísticos-pe, karai Catalino Recalde, ha omoirũta chupe Paraguái Ñe’ẽnguéra Sãmbyhyha.

Ipukúta 100 aravo ha og̃uahẽta 500 mba’apohárape INC roga guasu oĩva Paraguay ha Villeta táva peguápe; upe rire og̃uahẽta avei mba’apohára oĩva Vallemíme.

PÑ Sãmbyhyhára, Ladislaa Alcaraz de Silvero, omoirũ ko guarani jehekombo’e ñemoñepyrũ ha omomba’eguasu, ikatútare péicha ojeporu añete ko ñane ñe’ẽ INC ryepýpe. Omoirũ chupe Ñe’ẽ Rapereka Moakãharapavẽ, PÑS pegua, Celia Godoy.

Ojehekombo’ekuévo guaraníme niko oñeñeha’ã oñemoañete Léi 4251/10 Ñe’ẽnguéra reheguápe he’íva, ivore 17-pe, he’ihápe tetã mba’apohára oiporumanteva’erãha guarani ha castellano, tetã ñe’ẽ tee rupi ko’ãva.


Compartir esta noticia

Últimas Noticias Publicadas