Logotipo.png
Léi rupive ojeguerojera “Comisión Nacional de Conmemoración del Año Internacional de las Lenguas Indígenas”
Publicado: 08/09/19 09:07:a. m.

Tetã Pokatuvete omoneĩ Léi 6352 oguerojeráva “Comisión Nacional de Conmemoración del Año Internacional de las Lenguas Indígenas”, Ypykuéra Ñe’ẽita Ary Yvy’ape Ári oguerojerava’ekue Organización de las Naciones Unidas (ONU) voi oñeñeha’ã oñemba’apo opa hendáicha ypykuéra ñe’ẽ rehehápe, ko’ãva ikangypaite nungáva ohóvo.

Ta’anga: Ojeguerojeráramoguare tetãpýpe Ypykuéra Ñe’ẽita Ary Yvy’ape Ári

Ko Comisión Nacional omoakãta Paraguái Ñe’ẽnguéra Sãmbyhyhára (PÑS), ha’e rire oĩta Instituto Paraguayo del Indígena (INDI) moakãhára, ha Tetã Arandupy Sãmbyhyhára (TAS)-gui oikóta relator.

Umi jehupytyrãitéramo oguerekóva ko Comisión niko: ombosako’iva’erã tembiaporã ha apopyrãnguéra oñemombarete hag̃ua ñane retã rekojopara ha omoasãi hag̃ua ypykuéra ñe’ẽita, ojegueroguatáva umi mbohapyve tetã pokatu guive. Avei, oñemba’apóta ojekuaave, ojeporu ha oñemomba’eve hag̃ua ypykuéra ñe’ẽita, ñane retã arandupy rypy’ũháicha.

Avei, toñeñemongu’e tekotevẽva ojehechakuaa hag̃ua ypykuéra ñe’ẽita derécho; ha tojegueroguata Plan de Normalización de la Lengua Guaraní, omoañetekuaátava mokõivéva ñane retã ñe’ẽ tee, he’iháicha Léi 4251/10 Ñe’ẽnguéra rehegua.

Ko Comisión ryepýpe oike INDI; peteĩ tapicha omba’apóva ypykuéra derécho rehe rérape; SNC sãmbyhyhára; Senatur sãmbyhyhára; peteĩ tapicha ypykuéra aty rerapegua; peteĩ MEC-gua; MRE-gua; MI-gua; SND-gua; STP-gua; MJ-gua; MTIC-gua; MSPyBS-gua; MM-gua; MDS-gua; ha CONES-gua.

Avei, Gabinete Social de la Presidencia de la República rerapegua; IPA; Itaipú; Yasyretá; Comisión de Cooperación UNESCO-MEC-gua; Centro Cultural de la República “El Cabildo”-gua; Comisión de Pueblos Indígenas de la Cámara de Senadores ha Cámara de Diputados-gua; Poder Judicial-gua; ha Guarani Ñe’ẽ Rerekuapavẽgua.

Ko Comisión Nacional oguatáta Consejo Nacional de Educación Indígena ha ambueve tenda oñemba’apohára ypykuéra ndive. Ko Léi 6352 rekove ojepysóta peteĩ ary pukukue, ha ojeipapáta oñombyaty ñepyrũ guive ko Comisión.


Compartir esta noticia

Últimas Noticias Publicadas