Logotipo.png
Mbohapy ary rire ojejopykuaáma ojepuru hag̃ua guarani ñe’ẽ haipýpe Estado tuichakue
Publicado: 08/08/18 08:49:a. m.

Omoneĩ rire Guarani Ñe’ẽ Rerekuapavẽ, Guarani Ñe’ẽtekuaa Tee, ha oguatávo Tetã Ruvichavete Tembiapoukapy 6797/17, Paraguái Ñe’ẽnguéra Sãmbyhyha, apoukapy rupive omoneĩ avei ko Ñe’ẽtekuaa ha he’i ohasa rire mbohapy ary ojeojopy kuaatamaha opaite tetã remimoĩmbýpe oipuru añete hag̃ua guarani ñe’ẽ haipýpe.

Léi 4251/10 Ñe’ẽnguéra reheguápe, heta ivorépe he’i ojepuru jojava’erãha mokõive ñane retã ñe’ẽ tee (guarani ha castellano), Estado tuichakue guive.

Upe 22 jasypoteĩme, GÑR omoneĩ kuri Guarani Ñe’ẽtekuaa Tee ha Apoukapy 101 upe 24 jasypokõi 2018 ramo PÑS omoneĩ ko mba’e. Avei, PÑS oguenohẽ Apoukapy 103 upe 30 jasypokõi ramo, he’ihápe ojeguerekoha mbohapy ary ha upe rire ikatútama ojejopy opaite tetã remimoĩmbýpe oipuru añete hag̃ua guarani ñe’ẽ haipýpe, he’ihaichaite Léi Ñe’ẽnguéra reheguápe; kóva ojeipapa ñepyrũ 22 jasypoteĩ 2018 guive, he’iháicha apoukapýpe.

Jepémo ikatumavoínte ojepuru kyre’ỹ guarani ha castellano ojoja, taha’e ijehai térã ayvúpe, ha upeichavoi oñeñeha’ã oñemba’apo ha ojeporomokyre’ỹ PÑS guive; katu, oñemoneĩ rire ko Guarani Ñe’ẽtekuaa Tee, ojeguereko mbohapy ary ojejopy hag̃ua ijepuru añete haipýpe, he’iháicha Léi Ñe’ẽnguéra rehegua ivore’i 51-pe.

Guarani ha castellano jepuru añete ñe’ẽ teeháicha jehaípe he’ise opaite kuatia, apoukapy, apopyrã, leikuéra, marandu opaichagua, ha ambueve ojehaihápe osẽva’erã guaraníme avei, castellano peguáicha, Estado tuichakuégui.

PÑS niko temimoĩmby ombohape, ogueroguata ha oñangarekóva tetã ñe’ẽnguéra rehe ñemba’apo ha upéichape omoañetéva Léi 4251/10 Ñe’ẽnguéra rehegua, ombohape ko’ã tembiapo joajúpe taha’e Estado ha ipypegua’ỹva temimoĩmbykuérea ndive.


Compartir esta noticia

Últimas Noticias Publicadas