Logotipo.png
Ñe’ẽ rerekua oguenohẽta Guarani Paraguái Ñe’ẽryru peteĩha
Publicado: 01/28/21 12:16:a. m.

Guarani Ñe’ẽ Rerekuapavẽ ombosako’i ko arapoteĩ 29 jasyteĩrã, 10:00 aravo jave, Guarani Paraguái Ñe’ẽryru ñeguenohẽ, tenonderãite ojapóva peichagua aranduka ko temimoĩmby omba’apóva ko ñe’ẽ apoukapy apo rehe.

Ko aty ojeikuaaukatahápe ñe’ẽryru, omoirũtava GÑR mburuvichakuéra, ikatúta ojehecha Guarani Ñe’ẽ Rerekuapavẽ ha Paraguái Ñe’ẽnguéra Sãmbyhyha Facebook tupive.

Ko ñe’ẽryru tenonderãite osẽtava -Atypavẽ Pehẽ Omba’apóva Ñe’ẽndy ha Ñe’ẽpyahukuéra rehe ñepia’ã mba’ere rupive ha mayma GÑR ñepytyvõme- oguereko 2.000 ñe’ẽ potaite; ko ñe’ẽryru guaraníme añónte osẽta; he’iséva, oñe’ẽta guaraietépe ko ñe’ẽ ha he’iséva rehe.

Peteĩteĩva umi ñe’ẽ ohechauka mba’eichagua ñe’ẽpa ha ohesa’ỹijo guaraníme upe térã umi he’iséva, ohechaukakuévo avei techapyrãme ijepuru, oñeguenohẽpyréva jehaipýgui, ko ñe’ẽ oñemono’õ pyrégui, hetave ñe’ẽporãhaipyre ha mbo’epyrãnguéra kuatiágui.

Ko ñe’ẽryru oñeguenohẽtava ndahetái gueteri oguereko ñe’ẽ, upéva rehe ikatúne oñemyatyrõ térã oñemongakuaave. Upéva he’ise, ko ñe’ẽryru ojejapohahíha ohóvo ha upa ñe’ẽ puruhára, térã umi oñembokatupyrýva akóinte ipype, ikatu oipytyvõ ojehetejora, oñeñangareko ha oñemoporãvévo ko ñe’ẽ, péicha he’i hikuái GÑR guive.

Guarani Ñe’ẽ Rerekuapavẽ niko peteĩ temimoĩmby tetãmegua’ỹva, ndoku’éiva viru rehe ae, omoheñoiva’ekue Léi 4251/10 “Ñe’ẽnguéra rehegua”. Umi hembiaporã tee apytépe oĩ: guarani ñe’ẽ achegety, ñe’ẽteekuaa ha ñe’ẽryru apo; umi ñe’ẽ puruhára omoheñóiva ñe’ẽ pyahu ñemono’õ ha ijegueroike ko ñe’ẽme; ñe’ẽ yma jeipuru jey ha iñemokyre’ỹ ojepuru jey hag̃ua; ha ambueve mba’e.

Reikuaaséramo mamóguipa ikatu rejogua ko Guarani Paraguái Ñe’ẽryru, térã ambueve GÑR rehegua marandu, ikatu rehai ko GÑR red social-kuérape térã rehenói (0983) 822-938-pe.


Compartir esta noticia

Últimas Noticias Publicadas