Logotipo.png
Og̃uahẽma poteĩha “Rohayhu che ñe’ẽ”, guarani arapokõindy
Publicado: 08/14/19 08:25:a. m.

Paraguái Ñe’ẽnguéra Sãmbyhyha (PÑS) ombosako’i poteĩha ojohapykuéri ha oso’ỹre ko guarani ñe’ẽ ñemomorãguasu arapokõindy “Rohayhu che ñe’ẽ”. Ko tetã ñe’ẽ ojeporuvéva ñemomorã ojepysóta 19 guive 23 peve ko jasypoapýpe, ha oikóta arandupy ñehesa’ỹijo, ko ñe’ẽ ñemoherakuã porã opavave omomba’e hag̃ua, heta hayhuhára ha imoasãihárape ñembojopói, ha hetave mba’e.

Ko ñemomorãguasu rupive oñemoherakuã porãse ko guarani ñe’ẽ opavave omomba’e ha oikove ha hag̃ua ipype opárupi ha opa mba’erã, taha’e oñeñe’ẽ térã ojehaikuévo; ha péicha oñemomba’e ñe’ẽ teeháicha, castellano ndive.

Oñemoñepyrũta “Rohayhu che ñe’ẽ” 2019 pegua ág̃a arakõi oúvape, 19 jasypoapýpe 10:00 aravo jave, Secretaría Nacional del Turismo-pe. Araapýpe, 10:00 aravo jave oñemohu’ãta Curso de Guaraní Comunicativo, Industria Nacional del Cemento-pe. 19:00 aravóramo, upe árape, Instituto Superior de Lenguas (UNA)-pe oikóta “Conferencia sobre la enseñanza de la lengua guaraní en la Educación Superior”.

Ág̃a ararundýpe, 15:00 aravo guive oikóta Centro Cultural de España Juan de Salazar-pe ñomongeta guasu “Avances y desafíos de la lengua guaraní en la actualidad” rehe. 09:00 aravo guive, arapópe, oikóta Universidad Evangélica del Paraguay-pe, “Seminario de buenas prácticas sobre el uso de la lengua guaraní en la función pública”.

Upe arapópe 18:00 aravo guive, Embajada de Brasil-pe oikóta Festival del idioma guaraní. Arapoteĩme, 10:00 aravo guive, jepiveguáicha oñembojopóita heta tapicha iguarani rayhýva ha omba’apóva hérape opa hendárupigua; kóva oikóta Biblioteca del Congreso Nacional-pe. Heta tetãmegua ha ipypegua’ỹ oykeko kyre’ỹ ko’ã aty opaichagua, ikatuhápe ojeike reínte.

Heta mba’e porã apo rupive, omoirũ kyre’ỹta ko guarani ñe’ẽ ñemomorã guasu arapokõindy opaite umi Institutos de Formación Docente tetãpy tuichakue javeve, opa umi Unidad de Asuntos Lingüísticos guive, ha heta ambueve temimoĩmby guive.

Ko guarani ñe’ẽ ñemomorã guasu arapokõindy “Rohayhu che ñe’ẽ” rupive oñemombareteseve ñane retã rayhu, toñemombareteve guarani, tetã ñe’ẽ teeháicha, tojehupive mayma tetãyguára remiandu iñe’ẽre, ijeporu meme rupive mamo hendárupi ha opa mba’erã.



Compartir esta noticia

Últimas Noticias Publicadas