Logotipo.png
Ojegueroike guarani mbo’esyry 40 mbo’ehaovusúpe heta tetãmeguápe
Publicado: 10/10/20 07:45:a. m.

Oiko aja II Plenario de Rectores y Rectoras oĩva Asociación de Universidades Grupo Montevideo (AUGM) ryepýpe -omono’õva tetã mbo’ehaovusu ha ijeheguiguáva Argentina, Bolivia, Brasil, Chile, Paraguay ha Uruguauy pegua-, umi 40 mburuvicha oĩva ipype omoneĩ Cátedra Guaraní oñehesa’ỹijo hag̃ua mbo’esyry guaraníme ha guarani arandupy rehegua opa ko’ã mbo’ehaovusúpe oĩva AUGM ryepýpe.

Ojegueroike hag̃ua guarani mbo’esyry opa ko’ã AUGM pegua mbo’ehaovusúpe niko oisãmbyhy Universidad Nacional de Itapúa (UNI) Paraguái pegua, ha omog̃uahẽ oñombyaty aja tembipurupyahu rupive Consejo de Rectores AUGM pegua. Paraguái Ñe’ẽnguéra Sãmbyhyha (PÑS) omoirũ ha oykeko ko apopyrã guasu.

Oikuaaukávo ko apyrã guasu omoakãmbáva UNI, Hildegardo González Irala, he’i ha’e castellano-pe: “los miembros de este Consejo tenemos un rol clave para buscar las estrategias necesarias y darle mayor importancia e interés a lo nuestro”.

Ko guarani mbo’esyry rupive niko oñehesa’ỹijose mbo’epy joajúpe, taha’e tekombo’erã, tembikuaarã térã mbo’ehaovusu rembiapo okápe rehegua, jahechápa toñembohasa ojupe kuaapy, guarani ñemoherakuã ha ijepuru meme Mercosur ñe’ẽháicha, iñaranduvakuéra apytépe, mayma tetãyguára, tavaha pegua ha opa umi tetã mburuvicha rupive avei.

Avei, ojeguerojerase mbo’epyrã omombaretekuaátava guarani ñe’ẽ umi mbo’ehararã arandupyeta pegua ñembokatupyrýpe, ha avei tembiapo joaju ojejeporeka hag̃ua guarani ñe’ẽ ha iñarandupy rehegua kuaapy rehe.

Ta’anga oñeñombyatýrõ guare tembipurupyahu rupive.


Compartir esta noticia

Últimas Noticias Publicadas