Logotipo.png
OJEIKUAAUKA MBA’ÉICHAPA OGUATA MANJUI ÑE’Ẽ REHEHÁPE ÑEMBA’APO
Publicado: 08/09/17 03:29:p. m.

Ko arapópe peteĩ amandaje guasu “Lengua Manjui: investigación y rescate”-pe ojekuaauka mba’eichaitépa oguatahína tembiapo guasu oñeñongatu ha oñemombarete jey hag̃ua manjui ñe’ẽ; ko tembiapo omoakã Paraguái Ñe’ẽnguéra Sãmbyhyha (PÑS) ha oipytyvõ Consejo Nacional de Ciencia y Tecnología (Conacyt).

PÑS Sãmbyhyhára, Ladislaa Alcaraz de Silvero, omoñepyrũ ko aty guasu ha he’i ipy’aite guive mba’éichapa ko’ã manjui ohechauka ñandéve avavete ko’ã ñande ypykuéra apytégui nomboykeséi iñe’ẽtee. Omombe’u ijetu’uha ojegueroguata apopyrã ñe’ẽrapereka rehegua, ha oguerovy’a avei oguata porãre ko tembiapo manjui ñe’ẽ rehehápe.

Ypykuéra Ñe’ẽ Ñeñongatu ha Ñemoasãi Motenondeha, PÑS guive, ojeikuaauka peteĩ ñeporandu guasu ha mba’épa ojeguenohẽ chugui ojejapova’ekue manjui rekoháre iñe’ẽ ha hekokuéra rehegua.

Upéi ojehechauka peteĩ ta’angaku’e ha ayvúpe ojejapóva manjui ñe’ẽ rehegua, iñarandupy, hembiasa ha heko rehegua.

Ñe’ẽraperekahára Argentina-gua, Javier Carol, oikuaauka hembiapo manjui ñe’ẽ rehegua. Omombe’u ko ñe’ẽ reko, retepy, hyapu ha ijehai rehegua; omombe’u avei oguataha ohovohína peteĩ manjui ñe’ẽ ryru osẽtava.

Ko amandaje oiko kuri Casa Bicentenario Augusto Roa Bastos-pe, Paraguaýpe, ha omoirũ heta ypykuéra, ha ambueve mburuvicha.


Compartir esta noticia

Últimas Noticias Publicadas