Logotipo.png
Ojeikuaaukáta Argentina-pe pa Mafalda aranduka guaraníme
Publicado: 04/24/19 07:19:a. m.

Ojeikuaaitemíva historieta “Mafalda”, argentina-gua Joaquín Lavado (Quino) oguerojerapyre, omoguaraníme 10 aranduka paraguaigua, María Gloria Pereira. Ko’ã aranduka oñeguenohẽta ág̃a 4 jasypópe, Feria del Libro oikóva Buenos Aires távape, Argentina-pe.

Ko’ã pa Mafalda guaraníme oñeguenohẽta “Ypykuéra Ñe’ẽita Ary Yvy’ape Ári” ryepýpe. Oikóta ág̃a arapokõime, 4 jasypópe, 18:00 aravóramo, Koty Carlos Gorostiza, Predio Ferial “La Rural”-pe, tape Avda. Sarmiento 2704 oĩhápe.

Mafalda niko oñembohasáma 27 ñe’ẽme, katu, guaranihína itenondetéva América ñe’ẽ tee apytépe omoñe’ẽ ambuéva ko historieta-pe.

“Mafalda Guaraníme” niko Editorial Servilibro rembiapo, oikéva apopyrã Proyecto Sur-pe, Cancillería argentina ha Argentina Embajada Paraguáipe mba’éva.

Ko guarani jeporu ãichagua aranduka ojeikuaa ha ojehayhúvape niko tuichaitere mba’e ko ñe’ẽ rekovépe g̃uarã, ikatútare oñemoherakuã ha oñemoasãi ko Paraguái ñe’ẽ tee.

#Ñamongu’eÑañangarekoÑamoingoveYpykuéraÑe’ẽita.

#YpykuéraÑe’ẽitaAryYvy’apeÁri, #UNESCO, #Ñandenikoypykuéra.


Compartir esta noticia

Últimas Noticias Publicadas