Logotipo.png
Oñeguenohẽta app oguerekóva tembipuru ñe’ẽasarã guarani-castellano-inglés ha heta mba’eve guarani jepururã
Publicado: 06/19/21 10:45:a. m.

Léi omohendaháicha (Art. 51, Léi 4251/10 “Ñe’ẽnguéra rehegua”), ko araapy, 22 jasypoteĩme, guive ikatútama ojeporojopy guarani ojepuru añete hag̃ua ahipýpe Paraguái Estado rembiapópe. Upéva ryepýpe, oñeguenohẽta tembipurupyahu hérava Guarani Ayvu, aplicación oguerekóva ñe’ẽasaha (guarani-castellano-inglés) ha heta ambueve mba’e ikatukuaáva oporopytyvõ guarani jepuru porãme.

Umi temimoĩmby omoañetéva ko apopyrã ningo Paraguái Ñe’ẽnguéra Sãmbyhyha, Guarani Ñe’ẽ Rerekuapavẽ, Instituto Superior de Lenguas FF-UNA pegua, ha mokõi ONG, ha’éva Grupo de Grabaciones en Guaraní ha Estados Unidos guive, PopulisTech.

Ko app Guarani Ayvu oñeguenohẽta ág̃a araapýpe, 22 jasypoteĩme, 10:00 aravo guive, Zoom rupive ha avei Paraguái Ñe’ẽnguéra Sãmbyhyha Facebook Live rupive ha avei umi ambue temimoĩmby mba’éva rupive. Omoirũta heta mburuvicha ñane retã megua ha avei tetã ambuegua.

Ko aplicación reiete ikatúta oñemboguejy ha ojepuru celular térã Tablet oguerekóva Android-pe. Ñe’ẽasaha oguerekóta ñepyrũrã 3.200 ñe’ẽ ha opaite umi oĩva guaraníme ikatúta oñehendu mba’éichapa hyapu.

Avei, oguerekóta heta ambueve mba’e guarani ñe’ẽme ha hesegua ojepuru porãve hag̃ua, taha’e achegety, iñe’ẽtekuaa ha mbojojahakuéra; avei léi rehegua, taha’e Léi Guasu térã Léi Ñe’ẽnguéra Rehegua; ha heta ambueve mba’e ojepurukuaáva guarani ojekuaave ha ojepuru porã hag̃ua.

Amandaje

Upe léipe he’íva yvateve rehehápe, ág̃a araapýpe, 22 jasypoteĩme, 14:00 aravo guive 17:30 peve, umi tembipurupyahu rupive, oikóta avei amandaje guasu hérava “Avances de la normalización y normativización de la lengua guaraní, según la Ley 4251/10 ‘De Lenguas’. Taimbarete guarani ayvu ñane retã ha tetã ambuépe”.

Ko amandaje rupive oñehesa’ỹijóta mba’etépa he’ise upe léipe he’íva, guarani jepuru haipýpe tetã rembiapópe jejopy, ha avei ojeikuaaukáta opa umi mba’e ojejapómava ko léi ári ojepuru añete hag̃ua guarani, tetã ñe’ẽ tee háicha, opa henda rupi.


Compartir esta noticia

Últimas Noticias Publicadas