Logotipo.png
Oñeguenohẽta Guarani Ñe’ẽtekuaa Tee
Publicado: 08/09/18 10:47:a. m.

Guarani Ñe’ẽtekuaa Tee oñeguenohẽ ñepyrũta ko arakõi 13 jasypoapy ramo, 10:00 aravo jave, Biblioteca y Archivo Central del Congreso de la Nación kotýpe, opytáva Río Ypané ha Río Aquidabán rapépe, ha omoirũta heta tetã mburuvicha.

Ko osẽtava niko Guarani Ñe’ẽ Rerekuapavẽ rembiapo, omoañetévo hembiaporã tee voi, he’iháicha Léi 4251/10 Ñe’ẽnguéra reheguápe, ivore’i 45º-pe: “Guarani Ñe’ẽ Rerekua rembiaporãngatu hína ko ñe’ẽ ñemboheko: ijehaípe, iñe’ẽndýpe, he’isévape, iñe’ẽ ñemohendápe ha iñe’ẽ syrýpe. Ohechaukava’erã guarani ñe’ẽndy tee ha ijeporu porã reko tee, ojekuaa hag̃ua”.

Ko Guarani Ñe’ẽtekuaa Tee oikuaaukáta Guarani Ñe’ẽ Rerekuapavẽ Yta, Carlos Ferreira, upéi oñe’ẽta hese Paraguái Ñe’ẽnguéra Sãmbyhyhára, Ladislaa Alcaraz de Silvero. Ko aranduka ombokuatia Editorial Servilibro.

Guarani Ñe’ẽtekuaa Teépe ojehesa’ỹijo ko ñe’ẽ ñemohenda, hetepy ha he’iséva, sa’iveháguivo ko ñe’ẽ ryapukue, ha avei upe tekombo’e ñepyrũrã, ohupytyséva avei ko aranduka, he’iháicha ijapoharekuéra. Ko kuatia ombojovake ha ombojoaju gramática descriptiva ha gramática normativa.

Ko Guarani Ñe’ẽtekuaa Tee niko oguenohẽ ñepyrũ Guarani Ñe’ẽ Rerekuapavẽ heta omba’apo rire hese, ohapykuererekávo ko ñe’ẽ ypa Montoya rembiapokue guive ha péina ko ára rupive guáva.


Compartir esta noticia

Últimas Noticias Publicadas