Logotipo.png
Oñeguenohẽta “Itaju ku’i”, 20 ñe’ẽyvoty iporãprãvéva guaraníme
Publicado: 11/25/19 01:17:p. m.

Ypykuéra Ñe’ẽita Ary Yvy’ape ári ryepýpe oñeguenohẽta ág̃a 27 jasypateĩme ñe’ẽyvoty ryru hérava “Itaju ku’i”, 20 ñe’ẽyvoty iporãprãvéva guaraníme. Ko aranduka omono’õ ñe’ẽyvoty ijoheipyréva guaraíme, oguenohẽva Tetã Arandupy Sãmbyhyha, Guarani Ñe’ẽ Rerekuapavẽ ha Grupo Editorial Atlas.

Ko aty aranduka ñeguenohẽrã oikóta 11:00 aravo jave Casa del Bicentenario Augusto Roa Bastos-pe, opytáva México 346, Paraguaýpe, ha omoakãta TAS sãmbyhyhára Rubén Capdevila, GÑR yta, Carlos Ferreira, ha Grupo Editorial Atlas rerapeguakuéra, avei umi haihára ha iñemoñarekuéra. Opakuévo opurahéita Cristina Bitiuska.

Ko aranduka, osẽva mokõi ñe’ẽme, guarani ha castellano, ojapo oñondive mbohapy ñe’ẽpapára ruvicha: Feliciano Acosta, Mario Rubén Álvarez ha Susy Delgado, ha’ekuére oiporavopaite ko’ã ñe’ẽyvoty, ombohasa castellano-pe, ha avei omoñe’ẽñepyrũ ko’ã ñe’ẽyvoty.

Opa umi ñe’ẽyvoty oĩva ko arandukápe:Ayvu Rapyta pehẽngue, Mbyá Guaraní Guairá pegua ñembo’e purahéi, omono’õva’ekue León Cadogan; Ñemitỹ, Federico Abente ohaiva’ekue; Tojajái, Zenón Bogado Rolón ohaiva’ekue; Mandu’a rory, Hérib Campos Cervera ohaiva’ekue; Chokokue purahéi, Mauricio Cardozo Ocampo ohaiva’ekue; Pehendu che ñe’ẽ, Félix de Guarania ohaiva’ekue; Ange pyhare, Aparicio de los Ríos ohaiva’ekue; Ñane aramboha, Félix Fernández ohaiva’ekue; Ko’etĩ jave, Emiliano R. Fernández ohaiva’ekue; Ñe’ẽ, Gregorio Gómez Centurión ohaiva’ekue; Jasy morotĩ, Darío Gómez Serrato ohaiva’ekue; Okaraygua akã sa’yju, Carlos Miguel Jiménez ohaiva’ekue; Kunu’ũ raitykuemi, Juan Maidana ohaiva’ekue; Okétavape, Carlos Martínez Gamba ohaiva’ekue; Pykasu morotĩ, Miguel Ángel Meza ohaiva’ekue; Nde resa kuarahy’ãme, Teodoro S. Mongelós ohaiva’ekue; Panambi vera, Manuel Ortiz Guerrero ohaiva’ekue; Che ropeaguýpe, Elvio Romero ohaiva’ekue; Hyku jasy, Lilian Sosa ohaiva’ekue; ha Chéko yvytu, Ida Talavera ohaiva’ekue.



Compartir esta noticia

Últimas Noticias Publicadas