Logotipo.png
​Oñembohape tembiaporã ypykuéra ñe’ẽita rehehápe
Publicado: 02/19/20 06:31:p. m.

Ypykuéra Ñe’ẽita Ary Yvy’ape Ári (YÑAYA) Aty Tetãmegua oñombyaty peteĩha ko 2020 arýpe ha omba’apo ko ararundy pyharevépe. Oiko Archivo Nacional kotýpe, oĩhápe tetã mburuvicha, ypykuéra rerapegua ha ambueve tekoaty rerapegua, oĩva ko atýpe.

Ko ñeñombyatýpe oñehesa’ỹijo umi aty’i rembiaporã rape, oñembosako’íva oñeñombyaty hag̃ua umi ypykuéra ndive oñeñomongetávo sãsópe ha oñemomarandúvo chupekuéra hekopete, ojejaposevahína heta hendápe ñane retãpýre.

Avei, oñehesa’ỹijo Ypykuéra Ñe’ẽita Ary Yvy’ape Ári (YÑAYA) Aty Tetãmegua jehaipy oñemog̃uahẽtava Ejecutivo ha Legislativo pokatuvetépe, he’iháicha artículo 6°-pe, Léi 6352/19-pe.

Paraguái Ñe’ẽnguéra sãmbyhyára, Ladislaa Alcaraz de Silvero, ohechauka haipy tembiapo rape ojeguerahaukátava Ejecutivo ha Legislativo pokatuvete renondépe, oñemoañetévo péicha Léi 6359/19.

Sãmbyhyhára ohechakukaa ojejapómava oñemoñepyũ guive ko aty, taha’e tembiaporã rape ñemoneĩ, ypykuéra rérape oĩtava jeporavorã kuatia, avei mba’éichapa ojegueroguatáta oñondivepa ko aty rembiapo ha iñemongu’e.

Omomba’e avei sãmbyhyhára Ladislaa Alcaraz de Silvero opa umi ojehupytýmava ko Ypykuéra Ñe’ẽita Ary Yvy’ape Ári (YÑAYA) Aty Tetãmegua rupive, ha opa umi ojejaposevahína ko arýpe umi po aty’i oĩva ko aty guasúpe rupvie, ojeykekóvo péicha mayma ypykuéra ñe’ẽ oikovéva Paraguáipe.

Ko atýpe ojeguerojera avei ñe’ẽpeteĩme ojejapotaha apopyrã guasu rape hérava Plan Nacional de Fortalecimiento y Revalorización de las Lenguas Indígenas en el Paraguay, avei heta ambueve tembiaporã oykekokuaátava ypykuéra ñe’ẽita imbaretevévo ko’ẽ rei rehe.


Compartir esta noticia

Últimas Noticias Publicadas