Logotipo.png
Oñepyrũ porãiterei amandaje guasu peteĩha ñe’ẽ rehegua
Publicado: 11/11/20 01:11:p. m.

Heta ñande rapicha omoirũ oñepyrũvo ko ararundy pyharevépe amandaje guasu I Congreso Paraguayo de Lingüística Aplicada (I CONPLA). Oñepyrũvo ko amandaje, omoirũ heta mburuvicha, oĩ Paraguái Ñe’ẽnguéra Sãmbyhyhára (PÑS), Ladislaa Alcaraz de Silvero, ha mbo’ehaovusu Universidad Nacional de Asunción (UNA) moakãhára, Zully Vera de Molinas.

Omoirũ avei Facultad de Filosofía, UNA ryepy pegua, moakãhára, Ricardo Pavetti, ha oisãmbyhýva Instituto Superior de Lenguas, FF-UNA, Valentina Canese. Avei heta ambue mburuvicha, ñande rapicha tembikuaahára iñarandúva, ha hetaiteve.

Ko amandaje oñemoñepyrũvo, oisãmbyhýva ISL, Valentina Canese, ohesa’ỹijo mba’ekuaapy hérava “Desafíos para la investigación en lingüística aplicada: una mirada desde el Instituto Superior de Lenguas de la UNA”.

Upe rire oñepyrũ ñomongeta hérava “Políticas Lingüísticas del Paraguay: avances de la normalización y normativización lingüística, desde la perspectiva de la Ley 4252/10, De Lenguas”, ha hyepýpe ohesa’ỹijo mba’ekuaapy PÑS sãmbyhyhára Ladislaa Alcaraz de Silvero; ha Guarani Ñe’ẽ Rerekuapavẽ yta, Carlos Ferreira.

Avei omoirũ chupekuéra omoakãva Academia Paraguaya de la Lengua Española, José Antonio Moreno Ruffinelli; ha tembikuaahára, Arnulfo Daniel Cabrera; ko pa’ũme oñeñomongeta avei ñe’ẽnguéra rerekua rehe, ha mba’éichapa oipytyvõkuaa Paraguái pegua ypykuéra ñe’ẽita ñemombaretépe.

Ko amandaje I Congreso Paraguayo de Lingüística Aplicada ñehesa’ỹijo, ojepysótava arapoteĩ 13 jasypateĩ meve, ryepýpe heta ñande rapicha arandu ha katupyry, ñane retã ha tetã’ambue pegua, ohechaukáta imba’ekuaapy heta ñe’ẽ rehegua ko’ã mbohapy ára pukukuépe.

Ko I CONPLA ojapo ISL, FF-UNA, ha oipytyvõ PÑS; reínte ikatu ojehecha ISL ha PÑS Facebook Live rupive. Ambueve marandu ojekuaaséva ikatu oñeporandu ko’ápe: congresos.isl.@fil.una.py.


Compartir esta noticia

Últimas Noticias Publicadas