Logotipo.png
Osẽ léi ohechakuaáva iñe’ẽngúva ñe’ẽ tee Paraguáipe
Publicado: 05/22/20 12:14:p. m.

Tetã Pokatuvete omoneĩ Léi 6530/20 “Que otorga reconocimiento oficial a la Lengua de Señas Paraguaya (LSPy)” ñe’ẽ ojepurúva oñeñomongeta hag̃ua, ijehekombo’erã, tapicha reko jekuaaukarã, arandupy jekuaaukarã ha ojehechakuaa hag̃ua ñe’ẽ derécho oguerekóva umi ñande rapicha nohenduporãiva Paraguáipe ha oipuru ypýva iñe’ẽngúva ñe’ẽ, oikove añete avei hag̃ua hikuái ñande apytépe.

Ta'anga: Yma guare.

Umi senador ha diputado-kuéra ñepytyvõme, ko lei osẽ hag̃ua oñemba’apo ñepyrũ hese Subcomisión de Información, Comunicación y Lengua de Señas guive, oĩva Comisión Nacional por los Derechos Humanos de las Personas con Discapacidad (Conadis)-pe, ha oisãmbyhýva Paraguái Ñe’ẽnguéra Sãmbyhyhára (PÑS), Ladislaa Alcaraz de Silvero.

Ko léipe he’i, Paraguái retã, umi temimoĩmby oĩva pevarã rupive, oisãmbyhýta jehekombo’e umi temimoĩmby oporombo’évape, ha omoneĩta ñe’ẽhasahararãme Paraguái Ñe’ẽnguéra Sãmbyhyha rupive.

PÑSpe avei, he’ihaichavoi Léi 4251/10 “Ñe’ẽnguéra rehegua”-pe, oñemoĩ mburuvicháramo omoañete ha ombohape hag̃ua ko léi 6530/20 ñemoañete, upeva’erã ko léi oguerojera PÑS ryepýpe Dirección General de Lengua de Señas.

Ko léi oñemoneĩramóva he’i avei opa umi Estado remimoĩmby, térã tetãmegua’ỹ omba’apóva hérape ha oñangarekóva ñande rapicháre, avei umi aty oikóva tetã guive oguerekova’erã katuete ombohasáva iñe’ẽngúva ñe’ẽme opa umi oje’éva, oñeñangarekóvo péicha mayma ñande rapicha nohenduporãiva derécho rehe oñemomarandúvo Estado-gui.

Ko Léi 6530/20 “Que otorga reconocimiento oficial a la Lengua de Señas Paraguaya (LSPy)” ndojokomo’ãi mayma ñande rapicha nohenduporãivape oiporavoséramo upa ambueichagua ñe’ẽ oipuru hag̃ua hekoha rehe.

Ko’ápe rehesakotúvo ikatu remboguejy Léi 6530/20 “Que otorga reconocimiento oficial a la Lengua de Señas Paraguaya (LSPy)”.


Compartir esta noticia

Últimas Noticias Publicadas