Logotipo.png
Peteĩ ñande ypykuéra ñe’ẽpapára oje’óita Paraguái rérape Colombia-pe
Publicado: 07/11/18 10:54:a. m.

Mba’eguasuete niko Paraguái ypykuéra ñe’ẽporãhaipyrépe g̃uarã ko peteĩ ypykuéra ñe’ẽpapára guaraní, Alba Eiragi Duarte, jeho 28° Festival Internacional de Poesía de Medellín, Colombia-pe. Ko ñe’ẽpoty aty guasu oikóta ág̃a 14 guive 21 jasypokõi meve ko 2018-pe, ha péina ko arýpe ojejapo “Poesía, Chamanismo y Cantos Originarios” reraitépe.

Ko ñe’ẽyvoty aty guasu oikótava Medellín távape, oĩva umi tuichavéva apytépe yvy’ape tuichakue, ohesa’ỹijóta ko arýpe ko’ã mba’e: “Poesía, chamanismo y cantos originarios; Pensar y soñar desde Nuestra América, Sanar y poetizar; y Diálogos de la Tierra”.

Ko ñe’ẽyvoty aty guasu, omono’õva jepi heta ñe’ẽyvotyja yvy’ape tuichakuégui, oñembosako’i ko arýpe ojehesa’ỹijo hag̃ua mombe’ugua’u ha kerayvoty, ojoajúvo ñe’ẽpotýre.

Alba Eiragi niko ypykuéra moakãhára, aché ñemoñare ha okakuaava’ekue avá guarani apytépe, Colonia Fortuna-pe, Canindeyú Tetãvorépe. Oñemoarandu Trabajo Social ha Comunicación-pe, avei Educación Intercultural-pe.

Oguenohẽ ary ohasava’ekuépe iñe’ẽyvoty aranduka hérava Ñe’ẽyvoty – Ñe’ẽpoty, upérõ oikeva’ekue Sociedad de Escritores del Paraguay-pe, ha upéichape ha’e raẽvete ha ha’eñoite gueteri kuña indígena oĩva ko atýpe.

Ko ñane retã ñe’ẽpapára oĩta opa umi aty oñemoñe’ẽtahápe ko aty guasúpe, ha avei ohesa’ỹijóta imba’ekuaapy ha omoirũta ñomongetajere.

Ojehechakuaávo hapykuerepukúmaha ipehẽnguekuéra rérape oñepia’ãvo, ojeipepirũ avei chupe ohesa’ỹijo hag̃ua “La escritura poética como forma de sanación” (omombe’úvo hembiasa).

SEP mburuvichakuéra oipytyvõ chupe oje’ói hag̃ua ko 28° Festival Internacional de Poesía de Medellín-pe.


Compartir esta noticia

Últimas Noticias Publicadas