Logotipo.png
​PÑS ha Cancillería ojoykeko Paraguái ñe’ẽnguéra rehehápe
Publicado: 09/08/21 01:36:p. m.

Oñombyaty ko ararundýpe Paraguái Ñe’ẽnguéra Sãmbyhyhára (PÑS), Ladislaa Alcaraz de Silvero, ha Tetãnguéra Ndive Jekupytyrã Motenondehára, Euclides Acevedo, ha oñomongeta hikuái umi mba’e ikatúva omongu’e oñondive ko’ã mokõive tetã remimoĩmby jahechápa ñane retã ñe’ẽnguéra tove taimbareteve ha taherakuã porã ñane retã ha tetã ambue rehe.

Oñe’ẽ avei hikuái Instituto Iberoamericano de Lenguas Indígenas rehe, péva heñói hag̃ua heta oipytyvõ ko’ã mokõive ñane retã remimoĩmby. Avei, mba’eichaitépa Paraguái oipytyvõta Ypykuéra Ñe’ẽita Yvy Ape Ári Ñemomorã Pa Ary Pykukue (2022-2032).

Upéichante avei, PÑS sãmbyhyhára ojerure motenondehárape jahechápa upa umi ñane retã embajada-kuéra guive tove tojeykeko guarani ñe’ẽ ojeporu meme hag̃ua castellano ykére, mokõivéva ñane retã ñe’ẽ teeháicha.

Ko atýpe, oikova’ekue Cancillería rógape, PÑS sãmbyhyhára ombojopói avei motenondehára Euclides Acevedo-pe Rohayhu Che Ñe’ẽ rupive, akóinte oipuru rehe guarani mamo henda rupi.

Paraguái Ñe’ẽnguéra Sãmbyhyha ha Tetãnguéra Ndive Jekupytyrã Motenondeha ogueroguata hembiapo joajúpe peteĩ ñoñe’ẽme’ẽ ári, ha upéicha oñopytyvõ hikuái Paraguái ñe’ẽnguéra rehehápe.

Ko atýpe omoirũ motenondehárape Gabinete moakãharapavẽ, embajador Julio Duarte Van Humbeck; Relaciones Culturales y Turismo moakãhára, ministro Jorge Brizuela,ha Alejandra Acosta, Relaciones Culturales y Turismo Moakãha pegua.



Compartir esta noticia

Últimas Noticias Publicadas