Logotipo.png
“Rohayhu che ñe’ẽ”: Ñañehenoimbaite ñamomorãvo guarani peteĩ arapokõindy pukukue
Publicado: 08/20/20 07:56:a. m.

Paraguái Ñe’ẽnguéra Sãmbyhyha (PÑS) ombosako’i pokõiha ojohapykueripaite guarani ñe’ẽ arapokõindy “Rohayhu che ñe’ẽ” ohótava hese 24 jasypoapy guive 28 peve. Ko ñehenoiguasu ñamomba’eve jeývo guarani ohenói mayma ñane retãyguárape oikove hag̃ua ko ñe’ẽme ha hendive mamo hendápe ha opa mba’erã.

Ko 2020 arýpe, mba’asy guasuete covid-19 rupi, opaite mba’e oñembosako’íva ojejapo hag̃ua guarani arapokõindy “Rohayhu che ñe’ẽ” ryehpýpe, oikopaitéta tembipurupyahu Paraguái Ñe’ẽnguéra Sãmbyhyha mba’éva rupive, taha’e Zoom térã Facebook Live rupive.

Ko “Rohayhu che ñe’ẽ” 2020 oñemoñepyrũta ág̃a arakõi 24 jasypoapýpe, 10:00 aravo guive, PÑS, Tetã Arandupy Sãmbyhyha ha Tekombo’e ha Tembikuaa Motenondeha mburuvichakuéra ñemoirũme. Upe árape avei, 13:30 aravo guive, ojeikuaaukáta apopyrã “Aime porã”, ombosako’íva oñondive PÑS ha Pharmanest SA.

Araapy 25-pe, Guarani Ñe’ẽ Ára, 10:00 aravo jave, jepiveguáicha oñembojopóita “Rohayhu che ñe’ẽ” rupive heta ñande rapicha akóinte omoherakuã ha oipuru meméva hembiapo térã hekohápe guarani ñe’ẽ. Upe árape avei, 13:30 aravo guive, oñemohu’ãta Guarani Ñe’ẽ Jehekombo’e tetã mba’apoharakuérape; aty ombosako’íva PÑS ha Tetã Rembijokuái Sãmbyhyha.

Araapýpe avei, 18:00 aravo guive, PÑS ha Instituto Superior de Lenguas (FF-UNA) ojapóta amandaje hérava “Hechos históricos de la lengua guaraní, como lengua oficial del Paraguay”.

Ararundy 26 ramo, 10:00 guive, PÑS ha Guarani Ñe’ẽ Rerekuapavẽ ogueroguatáta amandaje hérava “Avances de la normalización y normativización de la lengua guaraní en la actualidad”.

Arapo 27-pe, 10:00 aravo guive, oñepyrũta amandaje hérava “II seminario de buenas prácticas sobre el uso de la lengua guaraní en la función pública”, aty ombosako’íva oñondive PÑS ha Unidad de Asuntos Lingüísticos-kuéra. Upe árape avei, 19:00 aravo guive, ojeguerovy’a ha oñemokerambipúta guarani ñe’ẽme heta ñane retã puraheihára ndive.

Upé arapoteĩ 28-pe, 10:00 aravo guive, MEC, ANEAES ha CONES ohesa’ỹijóta peteĩ amandajépe “Avances de la lengua guaraní en la Educación Superior”. Ha oñemohu’ãvo guarani arapokõindy “Rohayhu che ñe’ẽ” 2020, 19:00 aravo guive ojeguerovy’áta hekove ñe’ẽyvotyeta rupive oñembo’ayvútava heta hende guive.

Opa ko’ã mba’a oñembosako’íva oñemomorã jeývo guarani arapokõindy ojehechapaitéta Paraguái Ñe’ẽnguéra Sãmbyhyha Facebook Live rupive. Avei, PÑS guive roipepirũ ha romokyre’ỹ mayma tetãyguárape, taha’e oikóva Paraguái yvýpe térã tetã ambuére, tove toipuru ko ñane ñe’ẽ iporãitéva mamo hendápe ha opa mba’erã.


Compartir esta noticia

Últimas Noticias Publicadas