Logotipo.png
Sãmbyhyharakuéra omba’apo joajúta anive hag̃ua ojeapo’i guarani
Publicado: 03/04/21 10:40:a. m.

Paraguái Ñe’ẽnguéra sãmbyhyhára (PÑS), Ladislaa Alcaraz de Silvero; Ministerio de Trabajo, Empleo y Seguridad Social (MTESS) motenondehára, Carla Bacigalupo, ha Tetã Arandupy sãmbyhyhára (TAS), Rubén Capdevila, oñombyaty ha omba’apo hikuái jahechápa noñembohapéi tekotevẽva ojejapo ha guaraníme oñe’ẽvape anivéma hag̃ua oje’apo’i hembiapohápe.

Oñombyaty rire hikuái, PÑS sãmbyhyhára omombe’u tuicha mba’eha ko tembiapo joaju oñemoñepyrũva oñeñangarekóvo ñane retãyguakuéra ñe’ẽ derécho rehe, oñemohendapavavoi Léi Guasu ha Léi 4251/10 “Ñe’ẽnguéra Reheguápe”.

“Tuichaiterei mba’e ko roñombyaty péicha romba’apo joajúpe, ikatu hag̃uáicha jahapejoko oporo’apo’isévape ñande rapichápe hembiapohápe ñe’ẽ oipurúvare”, he’i sãmbyhyhára.

He’i avei mburuvichakuéra oñeñeha’ãtaha ojehekombo’eve guarani ñe’ẽ ha Paraguái jepokuaakuérape umi ñane retãyugára ha pytaguakuérape, Servicio Nacional de Promoción Profesional (SNPP) rupive.

Ko’ã mbohapy tetã mburuvicha oñombyatýkuri ha omba’apo kuehe, ararundýpe, MTESS rógape, opytáva Paraguay távape.


Compartir esta noticia

Últimas Noticias Publicadas