Logotipo.png
Tekojopara mbo’ehaovusúpe rehe oñeñe’ẽ FIL-pe
Publicado: 06/05/19 02:31:p. m.

Paraguái Ñe’ẽnguéra Sãmbyhyha (PÑS) ombosako’i ko ararundýpe arandu ñehesa’ỹijo hérava “Desafíos de la educación superior desde la perspectiva de la interculturalidad”, Ypykuéra Ñe’ẽita Arapokõindy ryepýpe, Arandukaita Jehechaukaguasu 2019-pe, Paraguaýpe. Ko aty oike avei Ypykuéra Ñe’ẽita Ary Yvy’ape Ári kuápe.

Peteĩ umi tapicha arandu oñe’ẽva apytépe niko oĩ kuri antropóloga, Marilín Rehnfeldt, ha oñe’ẽvo tekojopara mbo’ehaovusúpe rehe, he’i jepevémo heta mba’e porãma oñemoneĩ léi ári, añetehápe sa’i gueteri oñemoañete ko’ãva.

“Existe cierto progreso pero marcadamente insuficiente la participación de los indígenas en la educación superior. Falta más inversión en becas, infraestructuras, en la provisión suficiente de recursos humanos”, he’i.

Ohechakuaa Tekombo’e ha Tembikuaa guive oñeñeha’ãha heta mba’e ojejapo ha ãva apytépe ojehekombo’e mbo’ehára ypykuéravape, ha avei ojejapo umi aranduka ojehekombo’e hag̃ua hikuái iñe’ẽ teepekuéra; avei, he’i tekotevẽha oñemba’apo ypykuéra ñe’ẽ rehe ojehekombo’e hag̃ua chupekuéra og̃uahẽ meve mbo’ehaovusúpe.

Rehnfeldt-pe hi’ã ko Ypykuéra Ñe’ẽita Ary Yvy’ape Ári aja ojehechakuaa ko’ã mba’e oikotevẽva hikuái.

Ambue tapicha arandu oñe’ẽva’ekue niko Norma Marecos, Agencia Nacional de Evaluación y Acreditación de la Educación Superior (ANEAES) guive, ha he’i tuichamba’eha mbo’ehaovusu oñakãrapu’ã hag̃ua América Latina ha Caribe. Avei, arandupýre jetypeka ha mba’e pyahu apo, ava reko jerarã, ava’aty ha virurã.

Marecos he’i tekotevẽha ñamba’apo arandupy jopara rehe, tekoita oikovéva ojoja, oñomomba’epaguasukuévo.

Imandu’a umi ojejesarekóvare oñemoneĩ hag̃ua mbo’ehaovusu oĩ porãgui, ha péva apytépe, mokõivéva ñane retã ñe’ẽ tee, guarani ha castellano, oikeva’erã mbo’epy katueteguáva térã ojeporavóntevaramo, ojehechakuaávo avei temimbo’e ñe’ẽ.

“Existe un avance importante en el cometido de elevar el estatus del idioma guaraní”, he’i Marecos.

Omohu’ãvo he’i “La enseñanza de una lengua originaria en la educación universitaria desafía toda la dinámica institucional a pensar en un currículum acorde a las necesidades del contexto y el planteamiento de propuestas metodológicas acordes a los propósitos trazados”.

Ko arandupy ñehesa’ỹijo niko ombosako’i PÑS, Instituto Nacional de Educación Superior “Dr. Raúl Peña” ndive.


Compartir esta noticia

Últimas Noticias Publicadas