Logotipo.png
Tembiapoukapy rupive Tetã Ruvichavete omoneĩ 2019 “Ypykuéra Ñe’ẽita Ñemomorã Guasu Ary”
Publicado: 01/10/19 09:40:a. m.

Paraguái Mburuvichavete, Mario Abdo Benítez, omboheraguapy Tembiapoukapy ipapapýva 1075 ha omoneĩ 2019 arýpe “Ypykuéra Ñe’ẽita Ñemomorã Guasu Ary” ha he’i Paraguái Ñe’ẽnguéra Sãmbyhyha oisãmbyhyva’erãha opa mba’e ojejapokuaáva temimõimby tetãygua ha ipypegua’ỹ ha avei ypykuéra aty ndive, ojegueromandu’ávo ko ary guasu.

Ko Tetã Ruvichavete Tembiapoukapy niko he’i “Ojehero -Ypykuéra Ñe’ẽita Ñemomorã Guasu Ary- ojepysóva 1 jasyteĩ guive 31 jasypakõi meve ko 2019-pe”.

Heta mba’épe ha heta hendáicha niko oñemomorãta ko ary pukukue. Ko ñane retã ypykuéra ñe’ẽita jeguerohory niko omoakãta Paraguái Ñe’ẽnguéra Sãmbyhyha (PÑS), heta ambue temimoĩmby ñepytyvõme.

Ijapoukapy ipapapýva 71/178-pe, ONU he’i 2019 ha’eha “Año Internacional de las Lenguas Indígenas” ha péva rupive tove tajahechakuaave heta ypykuéra ñe’ẽ ogueha ohóvo ha tekotevẽtereiha oñeñongatu ko’ãva, oñemombarete jey ha ojeikuaauka ha toñemba’apo pyha’e herapekuéra tetãpýre ha yvy’ape tuichakue. ONU ojerure UNESCO-pe omoakã hag̃ua ko ary ñemomorã guasu.

Paraguái Léi Guasu he’i, ivore’i 140-pe, opa umi ypykuéra ñe’ẽ, ha umi ambue sa’ive ojeporúva, tetã arandupy reheguaitevaha avei.

Avei, Léi 4251 Ñe’ẽnguéra rehegua ivore’i 12-pe he’i opa umi ypykuéra aty oikóva tetã yvýpe iderechoha oipytyvõvo chupekuéra Estado omoĩngove ha oiporu hag̃ua akói iñe’ẽnguéra ha heko, ikatu hag̃uáicha ha’ekueravoi avei oikove akóinte.

19 ypykuéra ñe’ẽ oikove Paraguáipe ha oike umi po ñe’ẽ rapópe: Guaraní, Mataco, Maskoy, Zamuco y Guaicurú. Ñande ypykuéra oĩ 120.000 rupi, péicha he’i Censo Nacional de Población y Viviendas para Pueblos Indígenas.


Compartir esta noticia

Últimas Noticias Publicadas