Logotipo.png
Tetã mba’apoharakuéra oñemoaranduvéta guaraníme
Publicado: 06/18/20 03:20:p. m.

Oñemboheraguapývo kuatia omomba’apojoajúva Paraguái Ñe’ẽnguéra Sãmbyhyha (PÑS) ha Tetã Rembijokuái Sãmbyhyha (TRS)-pe, oikóva ko arapópe, ikatútama ojegueroguatave guarani mbo’esyry tetã mba’apoharakuéra ndive.

Ko kuatia omboheraguapy mokõivéva temimoĩmby mburuvichaitekuéra, Ladislaa Alcaraz de Silvero (PÑS) ha Cristina Bogado (TRS). Ko kuatia rupive oñembopyahu ñe’ẽme’ẽ ojegueroguatamava’ekuevoi upe 2014 ary guive.

Sãmbyhyhára Ladislaa Alcaraz de Silvero ogueromandu’a Léi 4251/10 Ñe’ẽnguéra Reheguápe he’íva tekotevẽha tetã mba’apohára oipuru guarani ha’e rupi avei ñane ñe’ẽ tee, castellano ykére, ha hetaitetei ñane retãygua oipuruha ko ñe’ẽ.

Upéva ryepýpe, Alcaraz he’i hetaiterei ñane retãyguára oikoveha guaraníme. “Guarani ñe’ẽme oñandu, guarani ñe’ẽme oikuaa hekoháre oĩva, ojehúva ichupe, guarani ñe’ẽme omombe’u hemikotevẽ ha sapy’ánte oñemboyke anga chupekuéra iñe’ẽ rehe”, he’i sãmbyhyhára oñemboheraguapypa rire kuatia.

PÑS ha TRS ñe’ẽme’ẽ ha hembiapojoaju rupive, ko ára peve hetaiterei tetã mba’apohárama oñembokatupyry guaraníme, heta tetã remimoĩmby pegua, jahechápa péicha tove toñeñangareko hekópe guaraníme oñe’ẽvare.

Oñembopyahúvo ko ñe’ẽm’ẽ ko árape, ikatu jeýtapa hetave tetã mba’apohárape oñembokatupyry guarani jepurúpe, taha’e iñemboayvu térã ijehaípe.

Ñe’ẽ Rape’apo moakãharapavẽ, PÑS pegua, Celia Godoy, omoirũ sãmbyhyhára Ladislaa Alcaraz de Silvero-pe ko atýpe.


Compartir esta noticia

Últimas Noticias Publicadas