Logotipo.png
Tetã Mburuvichavete omoakãta “Ypykuéra Ñe’ẽita Ary Yvy’ape Ári” ñemoñepyrũ
Publicado: 04/15/19 09:38:a. m.

Paraguáipe oñemoñepyrũ añetéta “Ypykuéra Ñe’ẽita Ary Yvy’ape Ári”. Ko mba’e guasu oikóta ko’ẽrõ 16 jasyrundýpe, 10:00 aravo jave, Litoral del Palacio de López-pe (Paraguayo Independiente, Paraguay távape), ha omoakãta Tetã Mburuvichavete, Mario Abdo Benítez.

Ko aty omoakã Paraguái Ñe’ẽnguéra Sãmbyhyha (PÑS) ha Paraguái Ypykuéra Remimoĩmby Moakãha (PYRM). Upépe ojehechaukáta avei mba’yrumýi pyahuita ojoguava’ekue PYRM oipytyvõ hag̃ua heta ñane retã ypykuéra atýpe.

Tetã Pokatuvete, Tembiapoukapy ipapapýva 1075 rupive, he’i Paraguái oikeha avei “Ypykuéra Ñe’ẽita Ary Ypy’ape Ári”; ha avei, Paraguái Ñe’ẽnguéra Sãmbyhyha oisãmbyhyva’erãha opa mba’e ojejapokuaáva temimõimby tetãygua ha ipypegua’ỹ ha avei ypykuéra aty ndive, ojegueromandu’ávo ko Ary Guasu.

Ijapoukapy ipapapýva 71/178-pe, Asamblea General de las Naciones Unidas he’i 2019 ha’eha “Ypykuéra Ñe’ẽita Ary Ypy’ape Ári” ha péva rupive tove tajahechakuaave heta ypykuéra ñe’ẽ ogueha ohóvo ha tekotevẽtereiha oñeñongatu ko’ãva, oñemombarete jey ha ojeikuaauka ha toñemba’apo pyha’e herapekuéra tetãpýre ha yvy’ape tuichakue.

Paraguái Léi Guasu he’i, ivore’i 140-pe, opa umi ypykuéra ñe’ẽ, ha umi ambue sa’ive ojeporúva, tetã arandupy reheguaitevaha avei. Avei, Léi 4251 Ñe’ẽnguéra rehegua ivore’i 12-pe he’i opa umi ypykuéra aty oikóva tetã yvýpe iderechoha oipytyvõvo chupekuéra Estado omoĩngove ha oiporu hag̃ua akói iñe’ẽnguéra ha heko, ikatu hag̃uáicha ha’ekueravoi avei oikove akóinte.

19 ypykuéra ñe’ẽ oikove Paraguáipe ha oike umi po ñe’ẽ rapópe: Guaraní, Mataco, Maskoy, Zamuco y Guaicurú. Ñande ypykuéra oĩ 120.000 rupi, péicha he’i Censo Nacional de Población y Viviendas para Pueblos Indígenas.

#Ñamongu’eÑañangarekoÑamoingoveYpykuéraÑe’ẽita.

#YpykuéraÑe’ẽitaAryYvy’apeÁri, #UNESCO, #Ñandenikoypykuéra.


Compartir esta noticia

Últimas Noticias Publicadas