Logotipo.png
Ypykuéra ñe’ẽ jehekombo’e Paraguáipe rehe oñeñomongeta
Publicado: 06/06/19 02:27:p. m.

Paraguái Ñe’ẽnguéra Sãmbyhyha (PÑS) ombosako’i ko arapópe ñomongeta hérava “Lenguas indígenas y educación indígena en Paraguay”, Ypykuéra Ñe’ẽita Arapokõindy ryepýpe, Arandukaita Jehechaukaguasu 2019-pe, Paraguaýpe. Ko aty oike avei Ypykuéra Ñe’ẽita Ary Yvy’ape Ári (YÑAYA) kuápe.

Oñe’ẽ kuri ko atýpe, Ivonne Gaona ha Alba Velázquez, Dirección General de Educación Escolar Indígena (DGEEI), Tekombo’e ha Tembikuaa Motenondeha pegua, omombe’u hikuái mba’éichapa ojegueroguata ypykuéra ñe’ẽ teépe jehekombo’e ñane retãme.

Alba he’i ko Dirección guive oñeñeha’ãha ojehekombo’e ñepyrũ mitãnguérape iñe’ẽ teépe, ayvúpe, ipurahéi, iñembosaraiha, hembiapo jeguaka, hembiasa ha hembijeroviakuéra rupive.

He’i Ivonne, ko YÑAYA ryepýpe, DGEEI guive ogueroguataha hikuái apopyrã oñemoherakuã ha ojeporu hag̃ua ypykuéra ñe’ẽita ñane retãpy rehe tekombo’e rupive.

Upe rire oñe’ẽ pa’i José Zanardini, ha omombe’u mba’e porã oikova’ekue mbo’ehaovusu Universidad Católica de Asunción guive, ojehekombo’éramo guare mbo’eharakuéra ypykuéravape internculturalidad-pe. He’i tekotevẽha jaiko jojave ava’atyháicha, ikatu hag̃uáicha añetehápe oiko upe interculturalidad.

Ko ñomongeta rypy’ũ ombosako’i oñondive PÑS ha Tekombo’e ha Tembikuaa Motenondeha.


Compartir esta noticia

Últimas Noticias Publicadas