Logotipo.png
Ypykuéra pãi omohu’ã Licenciatura en Interculturalidad
Publicado: 03/30/21 07:47:a. m.

Kuehe, arakõi, 29 jasyapy, ára guasúkuri. Tava’i Itaguazu, Pãi Tavyterã rekoha, Pedro Juan Caballero, Amambay-pe, 60 ñande rapicha pãi tavyterãva ohechauka hembiapokue ha péicha omohu’ã jehekombo’epy mbo’ehaovusúpe hérava Licenciatura en Interculturalidad, ha péicha ha’ekuéra itenonde ko ñemoarandúpe ñane retãme.

Ko mba’e guasuete ñemoarandurã ombosako’iva’ekue oñondive mbo’ehaovusu Facultad de Humanidades y Ciencias de la Educación ha Tekombo’e ha Tembikuaa Motenondeha. Upéi omoneĩ CONES ha oñepyrũ oñemoarandu umi temimbo’e upe 2016 arýpe ko ypykuéra rekoha oje’emava’ekuépe.

Temimbo’ekuéra péina omohu’ãva imbo’epy ohechauka ha oikuaauka kuehe hembiapokuéra opa umi mbo’ehára ha mburuvichakuérape iñe’ẽ teepekuéra ha avei castellano-pe. Iporã ojekuaa oñemoarandu aja pukukue hikuái oñeñe’ẽhague chupekuéra iñe’ẽ tee pãime, guarani paraguayo ha castellano-pe.

Ko Licenciatura en Interculturalidad, mba’e porã ha peteĩha ramo ojejapóva ñane retãme, ohesa’ỹijókuri 47 módulos, ipuku 3.305 aravo (2.085 aravo oñehesa’ỹijo mbo’ehaokutýpe ha 1.220 aravo katu mombyry guive).

Ko tekombo’epy jepysokue pukukue, opa umi temimbo’e omoirũkuri hetaichagua aty ombosako’íva UNC, ko’ãva apytépe oĩ: opaichakua arandupy jehechauka, tekombo’e ára jepysokuépe, amandajeguasu ojepysóva avei tetã ambue rehe ha ohechaukahaguépe hikuái hembiapokuéra, ñoa’ãngatu aty, ha ambueve.

Tuichaiterei mba’égui ko ojejapóva, hi’ãta avei ojepyso ambue ypykuéra rekoha rehe, upeichamavoi ojejerure, tove tojegueraha avei ambue Paraguái tavusukuéra rehe, upéicha oje’e UNC guive.

Mburuvicha ko tavusu pegua ha mbo’ehaovusu Universidad Nacional de Concepción pegua omoirũ ko aty oikova’ekue kuehe, maymávante oñarakekopa ojuehe ani mba’asy vai covid-19 ova mavavére.


Compartir esta noticia

Últimas Noticias Publicadas