Logotipo.png
Brasil-pe oñeñe’ẽta portugués ha español ñe’ẽ tembikuaa ha tembipurupyahúpe rehe
Publicado: 02/15/22 10:53:a. m.

Amandaje guasu mokõiha hérava Conferencia Internacional de las Lenguas Portuguesa y Española (CILPE 2022), oñepyrũtava ko’ẽrõ, ararundy 16 jasykõime, ha ojepysóta arapoteĩ 18 peve, Brasilia (Brasil)-pe, ohesa’ỹijo ha ombojohovakéta mba’eichaitépa oĩ ko’ã mokõive ñe’ẽ yvy ape ári; avei, umi mba’e pyahu ojepurúva oñemoasãi hag̃ua ko’ã ñe’ẽ, taha’e arandupýpe, tembikuaa ha mba’e oñemboheko pyahúvape.

Paraguái Ñe’ẽnguéra Sãmbyhyhára (PÑS), Ladislaa Alcaraz de Silvero, oĩta avei ko amandaje guasúpe, ha’e ohesa’ỹijóta ambue tapicha arandu ndive “Lenguas, cultura, ciencia e innovación. Políticas”, ojeguatátava ko’ẽrõ, 16 jasykõime, 12:00 aravo guive 13:00 peve.

Oĩta avei hendive ko mesápe João Boaventura Ima-Panzo, CPLP moakãhára; Guillermo Escribano Manzano, Español en el Mundo moakãharapavẽ, ha Débora Soares, Ministério da Educação e Cultura, Brasil pegua.

Sãmbyhyhára Ladislaa ohesa’ỹijóta mba’éichapa ñe’ẽnguéra rehe oñemba’apo Paraguáipe. Avei, español ha portugués-pa mba’éicha oike heta ambue ñe’ẽ ha arandupy -ko yvy pehẽ meguápe- rekovekuápe; mba’éichapa ko’ẽ rei rehe hetave ipuruharakuéra ko Iberoamérica-pe, ha mba’éichapa ko’ãvape ombohasa heko ha ko’ãva rekópa mba’éicha avei oike ipypekuéra.

Ko amandaje mokõiha CILPE omoakã OEI, ha oipytyvõ Ministerio de Relaciones Exteriores Brasil pegua, tetã ojejapoha. Oipytyvõ avei Comunidad de Países de Lengua Portuguesa (CPLP), Secretaría General Iberoamericana (SEGIB), Instituto Internacional de Lengua Portuguesa (IILP), ha Camões I.P y del Instituto Cervantes.

Ikatu avei tembipurupyahu rupive oñemoirũ Iberoamérica tuichakue ko CILPE ha ikatu ojehechapaite opa umi mba’ekuaapy oñehesa’ỹijóva OEI Brasil pegua Youtube rupive: https://youtube.com/c/oeibrasil.

Compartir esta noticia

Últimas Noticias Publicadas