Logotipo.png
Ehenduapp, app oñehendu ha oñemoñe’ẽ hag̃ua Biblia guaraníme
Publicado: 05/10/22 04:44:a. m.

Grupo de Grabaciones en Guaraní (GGG) peteĩ ONG omba’apóva yma guivéma ñane retãme guarani rehehápe, oguenohẽ ramoite peteĩ aplicación celular-pe g̃uarã hérava Ehenduapp, oguerekopaitéva Ñandejára Ñe’ẽ guaraníme, taha’e oñehendu térã oñemoñe’ẽ hag̃ua. Ko app oĩma Play Store-pe oñemboguejy hag̃ua reiete celular-pe, oikóva Android ndive.

Ko aplicación oguerekopaitéva Biblia guaraníme, Génesis guive Apocalipsis peve, ombo’ayvu avei heta tapicha opa umi ojehaíva ipype; mba’eguasuete avei jajuhukuaáva ko tembipurúpe, péicha oykeko mbarete rehe guarani ñe’ẽme, ojehai ha oñehendu hag̃ua hekopete ko ñe’ẽ.

Ko tembiapo guasu, oñeñongatupaite hag̃ua ayvúpe ko aranduka tuichakue oñembohasapyre guaraníme, ojepyso mbohapy ary pukukue rupi. Upe rire, tenonderã oñeguenohẽ MP3-pe ha oñemosarambi reieténte, upe rire oñeguenohẽ ko app, ojejapóva Paraguáipe ha paraguaigua rembiapo, tembipuru oĩmava oñemboguejy hag̃uáicha.

Upaite umi 1.188 vore (31.187 vore’i) oguerekóva Ñandejára Ñe’ẽ ombo’ayvupaite 30 tapicha ñe’ẽasãihára guaranimegua, omoñe’ẽmbaitévo opa umi ava oĩva ko arandukápe ha avei umi omombe’úva ojehúva ipype.

Paraguái Ñe’ẽnguéra Sãmbyhyha omomba’eguasu ko tembiapo porã, omopa’ũgui péicha ñane guarani ñe’ẽ iñasãi hag̃ua tembipurupyahu rupive, upéichante avei, ikatu rehe mayma oipurúva omoñe’ẽ ha ohendu okopeporã ko guarani ñe’ẽ.

Grupo de Grabaciones en Guaraní (GGG)-pe PÑS ombojopoiva’ekue Rohayhu Che Ñe’ẽ rupive upe 2017 arýpe, opaite hembiapo rehe guarani ñe’ẽ rehehápe.


Compartir esta noticia

Últimas Noticias Publicadas