Logotipo.png
JOAJÚPE OÑEÑANGAREKÓTA OPA ÑE’Ẽ OIKOVÉVA PRESIDENTE HAYES TAVUSÚPE REHE
Publicado: 07/25/16 01:52:p. m.

Paraguái Ñe’ẽnguéra Sãmbyhyha (PÑS) ha Presidente Hayes Gobernación oñomoñe’ẽmeteĩ ha omba’apo joajúta oñangareko hag̃ua opa ñe’ẽ oikovéva ko tavusu tuichakue. Ko ñe’ẽme’ẽ ñembokuatia ha ñemboheraguapy omoañete ko arakõi pyharevépe, PÑS rérape, Isãmbyhyhára Ladislaa Alcaraz de Silvero, ha Presidente Hayes tavusu rérape, karai Gobernador Antonio Saldívar Bobadilla.

Ko tembiapo joaju rupive ojegueroikéta guarani jeporu joja castellano ykére ayvu ha kuatiápe Goberanción rembiapópe; upéichante avei, opa hendárupi, tavusu tuichakue, ojehechaukakuaahápe guarani jeporu joja castellano yke rehe, haipy ha ayvúpe.

Ambue tembiapora guasu oroguatátava oñondive ko ñe’ẽme’ẽ ári hína indígena kuéra ñe’ẽ oikovéva ko tavusúpe rehe ñeñangareko, taha’e oñeñongatu, oñemoasãi térã oñemombareteve hag̃ua, ha tenonderãite Pueblo Angaité ñe’ẽ.

Sãmbyhyhára Alcaraz ombopy’aguasu opa Goberanción mba’apohárape oiporu hag̃ua guarani hembiapópe, castellano ykére. “Tekotevẽ jaiporu meme ha joja mokõive ñane ñe’ẽtee ñañangareko jave Estado rérape”, he’i castellano pe Sãmbyhyhára.

Upéichante avei, Karai Gobernador he’i opavavenunga tapicha oñembojáva Gobernación pe, temikotevẽ reve, guaranínte iñe’ẽ ha heta jey castellano pe oñeñangareko hesekuéra. “Ñepyrũrã ñamba’apóta jahayhuka hag̃ua ko guarani ha jaikuaaukáta ndaha’eiha itavýva ñe’ẽ; ñamomba’éta ko iporãitéva jarekóva Paraguaigua háicha”, he’i castellano pe.

Ko ñe’ẽme’ẽ ñemboheraguapy oiko Presidente Hayes Gobernación rógape. PÑS Moakãharapavẽnguéra, María De las Nieves ha Domingo Aguilera, omoirũ avei ko aty.

Compartir esta noticia

Últimas Noticias Publicadas