Logotipo.png
Ko arakõime oñepyrũta guarani ñe’ẽ arapokõindy, Rohayhu Che Ñe’ẽ
Publicado: 08/19/22 09:32:a. m.

Ko arakõi oúvape, 22 jasypoapy guive, 26 meve, oiko jeýta Rohayhu Che Ñe’ẽ, ñehenói guasu ombosako’íva Paraguái Ñe’ẽnguéra Sãmbyhyha (PÑS), heta ambue temimoĩmby ñepytyvõme, oñeha’ãva omoherakuã porã, omoasãi ha omomba’eguasu jey guarani ñe’ẽ, tetã ñe’ẽ tee ha ojepuruvéva háicha ñande rekoha rupi.

Ko porundyha oikótava Rohayhu Che Ñe’ẽ ryepýpe ojegueroguatáta hetaitereichagua aty ha mba’eñehesa’ỹijo, guarani ñe’ẽ ñemoherakuã porã ha jehechakuaa ipuruharakuérape, ha ambueve mba’e, ojejapótava ñeñombyatýpe ha avei tembipurupyahu rupive, Facebook Live Paraguái Ñe’ẽnguéra Sãmbyhyha mba’éva rupive.

Ñehenói guasu oñemoñepyrũta ág̃a arakõi, 22 jasypoapýpe, 10:00 aravo guive, tembipuru pyahu rupive. Upe árape, 16:00, Instituto Superior de Bellas Artes-pe oñemomorãta Tavarandu Ára.

Araapýpe, 10:00 aravo guive, Biblioteca y Archivo Central del Congreso Nacional kotýpe, PÑS ha Secretaría Nacional Antidrogas oguenohẽta Tembiapo Jehechaukarã Tetãyguárape guaraníme oñembohasapyréva. Upe árape, 15:00 aravóramo, PÑS ha Ministerio Público ojapópta tembipurupyahu rupive ñomongeta “Guarani ñe’ẽ jepuru tekojojarã”.

Avei, ko árape, 18:00 aravo guive, tembipurupyahúpe, oikóta ta’angamýi ñe’ẽjovake hérava “Ta’angaryrýi mbyky guaraníme rehegua”, ombosako’íva ISBA. Avei, 19:00 aravo guive, tembipurupyahu rupive, oñeñomongeta jeréta “Guarani ñe’ẽ jepuru jeroviapy ryepýpe rehegua” rehe.

Ág̃a ararundýpe, 8:00 aravo guive, oikóta “Ñe’ẽarandu guarani ñe’ẽ jepuru tekombo’epavẽ rehegua”, Escuela de Perfeccionamiento de Oficiales del Ejército-pe. Upe árape, 10:00 aravo guive, Instituto Nacional de Educación Superior-pe, ojegueroguatáta amandaje hérava “Derécho ñe’ẽ ñemomba’eguasu rehegua tekombo’e ryepýpe”; kóva oiko jeýpe u pe pyharépe, 19:00 aravo guive, Universidad Evangélica del Paraguay-pe. Avei, upe árape, 18:00 aravo guive, ISBA ogueroguata tembipurupyahu rupive ñomongetajere pumbasy rehegua.

Oikoháicha voi jepi, aty tuichavéva oikóta 25 jasypoapýpe, Guarani Ñe’ẽ Árape, upépe oñembojopóita Rohayhu Che Ñe’ẽ rupive heta ñande rapichápe oipuru ha omoherakuã porãva guarani ñe’ẽ opa hendarupigua. Ko aty oikóta avei Biblioteca y Archivo Central del Congreso Nacional kotýpe, 10:00 aravo guive.

Upe arapópe, 18:00 aravo guive, tembipurupyahu rupive, oikóta avei amandaje “Guarani ñe’ẽ jeroguata tekombo’epavẽme rehegua” ha avei “Ñe’ẽndy tekombo’epavẽme g̃uarã jeikuaauka”.

Arapoteĩ, 26 jasypoapýpe, 10:00 aravo guive, tembipurupyahúpe, oikóta amandaje hérava “Guarani ñe’ẽ jeroguata rehegua tetã remimoĩmbyha rehe”. Ko ñehenoiguasu Rohayhu Che Ñe’ẽ 2022 oñemohu’ãta upe árape, 18:00 aravo guive, “Tetãita atyguasu mba’e’apoporãmby, ñe’ẽ ha arandupy ñembyaty rehegua” rupive, oikótava Instituto Superior de Lenguas, Facultad de Filosofía, UNA, rógape.

Jepiveguáicha, ko ñehenóiguasu Rohayhu Che Ñe’ẽ oipytyvõ hetaiterei tetã remimoĩmby ha ipypegua’ỹvakuéra, tetãpy tuichakue javeve. Opa umi mba’e ojejapóva, iñasãi avei, ha heta ambue mba’e voi katu ojejapo okaha rehe, ñane retãpýpe, guarani rehehápe.

Compartir esta noticia

Últimas Noticias Publicadas