Logotipo.png
Ojeguerojera Asociación Paraguaya de Lingüística Aplicada (APLA)
Publicado: 11/06/21 10:02:a. m.

Mburuvicha ha ñe’ẽ Paraguái pegua rehe omba’apovakuéra oguerojera ko arapoteĩme Asociación Paraguaya de Lingüísticas Aplicada (APLA), aty omongu’étava mokõive ñe’ẽ tee, ypykuéra ha pytagua ñe’ẽ ñehekombo’e, jehapereka ha ñemoasãi, avei kuaapy ñe’ẽporãhaipyre rehegua.

Mbohapypa tapicha, ijapytepekuéra oĩ avei Paraguái Ñe’ẽnguéra Sãmbyhyhára (PÑS), Ladislaa Alcaraz de Silvero; Guarani Ñe’ẽ Rerekuapavẽ yta, Carlos Ferreira; Instituto Superior de Lenguas FF-UNA moakãhára, Valentina Canese; Ateneo de Lengua y Cultura Guaraní moakãhára, David Galeano Olivera; ñe’ẽ rerekuára, mbo’ehára, kuaapy raperekahára, ha ambueve, oguerojera ñepyrũ ko APLA.

Umi jehupytyrã apytépe oguereko omongu’évo ñe’ẽ rehegua kuaapy ha ijeporu, avei filología ñehesa’ỹijo Paraguáipe, oñemba’apóvo umi ñe’ẽ teére, ypykuéra ha pytagua ñe’ẽ, ha avei ñe’ẽporãhaipyre rehe.

Avei, oñeha’ãta ohyvykói ha omoasãi ñe’ẽnguéra rehegua kuaapy; umi kuaapy jeikuaauka. Upéichante avei, omongu’éta mokõive ñe’ẽ tee, ypykuéra ha pytagua ñe’ẽita, iñe’ẽngúva ñe’ẽ ha ambueve jeporu, jehekombo’e ha jeikuaa.

Ko aty guasuete ojeguerojera Salón Centenario del Rectorado de la Universidad Nacional de Asunción-pe. Upépe, mayma umi tapicha arandu omoañeteva’ekue, omoneĩ avei estatuto ha umi mburuvicha omoakãtava ko aty.

Ko’ãva mburuvichakuéra réra: Valentina Canese (presidenta); Carlos Ferreira (vicepresidente); Mirtha Lugo (secretaria); Dionisio Fleitas (tesorero); Nelson Aguilera (vocal titular); Estela Mary Peralta (vocal suplente); David Galeano (síndico titular), ha Cristina Boselli (síndico suplente).


Compartir esta noticia

Últimas Noticias Publicadas