Logotipo.png
Oñeguenohẽta aranduka “Vocabulario Paĩ Tavyterã Guaraní”
Publicado: 01/27/22 07:36:a. m.

Aranduka, 40 ary oñemono’õpyre kuaapy ñe’ẽ rehegua, hérava “Vocabulario Paĩ Tavyterã”, ohaiva’ekue Celeste Escobar ha Gregorio Gómez Centurión, oñeguenohẽta ág̃a araapy, 8 jaykõime, 9:00 aravo guive, óga ñombyatyhápe, táva Ita Guasúpe, Amambay tavusúpe.

Paraguái Ñe’ẽnguéra Sãmbyhyha (PÑS), Apoukapy Ppy 136 rupive, omoneĩ de interés lingüístico ramo aranduka “Vocabulario Paĩ Tavyterã”; upéichante avei ojapo Tetã Arandupy Sãmbyhyha (TAS), Apoukapy Ppy 621 rupive, omoneĩ de interés cultural ramo ko tembiapo, kóva ko temimoĩmby ome’ẽ viru oñeguenohẽ hag̃ua ko aranduka, Fondos de Cultura 2021 rupive, Patrimonio Cultura rupive.

Ihaihára, Celeste Escobar, omombe’u ko aranduka omono’õha ñe’ẽ rehegua kuaapy 40 arýma oñembyatyva’ekue mokõi tendágui Paĩ Tavyterã Guaraní aty pegua, ha ojehai mbohapy ñe’ẽme: paĩ tavyterã guaraní, guaraní paraguayo ha castellano. Oñe’ẽ ka’avokuérare, tetã rehegua marandu rehe, tekoha-ára rehe, tekopy ha mba’ejeroviapy rehe, ha ambueve.

Avei, ko aranduka ñeguenohẽhápe oñemog̃uahẽ avei Apoukapy TAS Ppy 19/2022 “Por el cual se declara como Patrimonio Cultural Inmaterial Nacional de los saberes, rituales, técnicas artesanales, etc., de varias comunidades del pueblo Paĩ Tavyterã”.


Compartir esta noticia

Últimas Noticias Publicadas