Logotipo.png
Oñemboheraguapy ñoñe’ẽme’ẽ oñemba’apove hag̃ua guana ñe’ẽ rehe
Publicado: 03/22/22 12:08:p. m.

Paraguái Ñe’ẽnguéra Sãmbyhyha (PÑS) ha San Lázaro Tavao, Concepción Tavusu pegua, omboheraguapy ko araapýpe ñoñe’ẽme’ẽ ha ogueroguatáta hikuái tembiapo joaju omoañete hag̃ua ko tavaópe Léi 4251/10, Ñe’ẽnguéra Rehegua; ko’ýte, oñemba’apove hag̃ua ojehóvo ypykuéra Guaná aty hérava Río Apa ndive, oĩva ko tavaópe, ikatu hag̃uáicha oñeñongatu, oñemoasãi ha oñemombarete jey hag̃ua iñe’ẽ teekuéra.

Ñoñe’ẽme’ẽ ñemboheraguapy aty oiko ko ypykuéra rekohápe voi; omboheraguapy PÑS sãmbyhyhára, Ladislaa Alcaraz de Silvero, ha San Lázaro Tavao moakãhára, Joaquina Azuaga Ramírez.

Mokõive temimoĩmby he’i ojupe oñopytyvõtaha omoañete hag̃ua Léi Ñe’ẽnguéra Rehegua ko tavaópe, ko’ýte ojepuru añete hag̃ua guarani ñe’ẽ, tetã ñe’ẽ tee háicha, castellano ndive.

Avei, omba’apo kyre’ỹta hikuái oguerojerávo tembiapo ojekuaave ha oñeñongatu hag̃ua guana ñe’ẽ (ñe’ẽ ikangy ha oguepotámava), tembiapo ojegueroguatátava umi guanakuéra ndive voi.

Ko atýpe oñemoñepyrũ avei guana ñe’ẽ ñehekombo’e, apopyrã oipytyvõva Programa de las Naciones Unidas para el Desarrollo (PNUD). Oñemog̃uahẽ avei heta mba’e ojepurukuaáva Centro de Educación de Adultos, ha avei hi’upyrãnguéra umi ypykuérape g̃uarã.

PÑS guive omoirũ avei ko aty, Ypykuéra Ñe’ẽ Ñeñongatu ha Ñemoasãi moakãharapavẽ, Rossana Bogado, ha avei ko moakãhapavẽ megua mba’apoharakuéra, Ramón Barboza ha Matías Medina.


Compartir esta noticia

Últimas Noticias Publicadas