Logotipo.png
Oñembojopói ha’evévape mombe’urã jehaípe guarani ha castellano-pe
Publicado: 12/15/21 11:09:a. m.

Ko ararundy pyharevépe, peteĩ aty guasúpe, oñembojopói umi ha’eveva’ekuépe mombe’urã jehaípe guarani ha castellano-pe, ñoha’ã ombosako’íva Centro Cultural de la República El Cabildo ha Academia Olímpica Paraguaya (AOP), ha oipytyvõ Paraguái Ñe’ẽnguéra Sãmbyhyha (PÑS), Guarani Ñe’ẽ Rerekuapavẽ (GÑR) ha Comité Olímpico Paraguayo (COP). Ko aty oiko COP koty guasúpe.

PÑS sãmbyhyhára, Ladislaa Alcaraz de Silvero, omoirũva’ekue avei mombe’urã guaranimegua iporãvéva jeporavorã, oĩ avei ko atýpe ha omomba’u ko ñoha’ã, omopa’ũva ojojaite mokõive ñane retã ñe’ẽ teépe. Heta ambue mburuvicha omoirũ avei ko aty.

Ko’ãva umi ha’eveva’ekue ko mombe’urã guarani ha castellano-pe jehai ñoha’ãme 2021 arýpe: Gladys Mendoza, imombe’urã guaranimegua hérava “Mala Kara” rupive; ha Diana Viveros, imombe’urã castellano-pegua “Tormentos ocultos” rupive. Heta ambuevépe oñembojopói ha ojehechakuaa avei.


Compartir esta noticia

Últimas Noticias Publicadas