Logotipo.png
Oñembosako’i jeýma “Rohayhu che ñe’ẽ”, guarani ñe’ẽ arapokõindy
Publicado: 08/19/21 08:04:a. m.

Ko 23 jasypoapy guive 27 peve, 2021 arýpe, oiko jeýtama guarani ñe’ẽ arapokõindy ñemomorã hérava “Rohayhu che ñe’ẽ”, oñemongu’éva oñemomba’e, oñemoasãi, oñemombarete ha ojehechakuaávo tuicha mba’eha ko guarani, ombosako’íva 2014 ary guivéma ha oso’ỹre Paraguái Ñe’ẽnguéra Sãmbyhyha (PÑS), heta ambue temimoĩmby tetãmegua, ipypegua’ỹva ha ONG umíva ñepytyvõme.

Ko poapyha ojejapótava “Rohayhu che ñe’ẽ” ryepýpe oñembosako’i heta mba’e oikótava, taha’e arandupy ñehesa’ỹijo, guarani rayhuhárape jehechakuaa, ñe’ẽ ñemoasãi, jehechauka tuicha mba’eha, purahéi, ñe’ẽyvoty ha hetaiteve mba’e rupive, ojehechakuaapaitétava Paraguái Ñe’ẽnguéra Sãmbyhya Facebook Live rupive.

Oku’e ñepyrũta “Rohayhu che ñe’ẽ” 2021 ág̃a arakõi 23 jasypoapýpe, 10:00 aravo guive, heta tetã mburuvicha ñepytyvõme. Péva rapykuéri oikóta amandaje hérava “I seminario internacional sobre los avances de la lengua guaraní. Taimbarete guarani ayvu ha jehai ñane retã ha tetã ambuépe”.

Upe árape avei, 18:30 aravo guive, oikóta ambue amandaje hérava “La atención de la lengua materna como derecho lingüístico y experiencias de buenas prácticas para el logro de la competencia comunicativa bilingüe (guaraní-castellano)”.

Ág̃a araapy 24-pe, 10:00 aravo guive, ojegueroguatavéta amandaje hérava “I seminario internacional sobre los avances de la lengua guaraní. Taimbarete guarani ayvu ha jehai ñane retã ha tetã ambuépe”.

Upe 25 jasypoapýpe, Guarani Ñe’ẽ Ára, jepiveguáicha, 10:00 aravo guive, oñembojopóita “Rohayhu che ñe’ẽ” rupive heta ñande rapicha akóinte ohyvykóiva ko ñe’ẽ mamo henda guive. Upe árape avei, 18:00 aravo guive, oñeguenohẽ jeýta app Guarani Ayvu. Avei, 19:15 guive oikóta amandaje hérava “Experiencias exitosas de egresados de la carrera de Licenciatura en Lengua Guaraní”, ISL-UNA pegua.

Upe arapópe, 10:00 aravo guive, oikóta amandaje hérava “I Seminario de la Cátedra Guaraní de la AUGM”. Upe árape g̃uarã oñembosako’i avei, 18:30 aravo guive, amandaje hérava “Las implicancias de políticas lingüísticas en la formación de artistas en la Educación Superior”.

Arapoteĩme, 10:00 aravo guive, oikóta ñomongeta hérava “Avances del empleo de la lengua guaraní, como mecanismo de aseguramiento de la calidad en la Educación Superior”. Ha oñemohu’ãvo ko guarani arapokõindy ñemomorã, 18:30 aravo guive ojepurahéi ha oñemoñe’ẽ’yvoty ayvúta ko ñane ñe’ẽme.

Jepémo heta mba’e oñembosako’i guarani rehehápe ko arapokõindy ryepýpe, PÑS guive rojerure avei maymávape tañañomoirũmi ha jaipuru ko ñane ñe’ẽ mamo hendápe ha opa mba’erã, taha’e ñañe’ẽnguévo térã jahaikuévo, ha péicha ikatúta ñamombareteve ko’ẽ rei rehe ko ñane ñe’ẽ.

Compartir esta noticia

Últimas Noticias Publicadas