Logotipo.png
Oñembosako’i Rohayhu Che Ñe’ẽ 2022, ñehenói guasu guaraní oñemomorã hag̃ua
Publicado: 08/16/22 08:14:a. m.

Ág̃a 22 jasypoapy guive, 26 meve, oiko jeýta Rohayhu Che Ñe’ẽ, ñehenói guasu ombosako’íva Paraguái Ñe’ẽnguéra Sãmbyhyha (PÑS), heta ambue temimoĩmby ñepytyvõme, oñeha’ãva omoherakuã porã, omoasãi ha omomba’eguasu jey guarani ñe’ẽ, tetã ñe’ẽ tee ha ojepuruvéva háicha ñande rekoha rupi.

Ko porundyha oikótava Rohayhu Che Ñe’ẽ ryepýpe ojegueroguatáta hetaitereichagua aty ha mba’eñehesa’ỹijo, guarani ñe’ẽ ñemoherakuã porã ha jehechakuaa ipuruharakuérape, ha ambueve mba’e, ojejapótava ñeñombyatýpe ha avei tembipurupyahu rupive, Facebook Live Paraguái Ñe’ẽnguéra Sãmbyhyha mba’éva rupive.

Ñehenói guasu oñemoñepyrũta ág̃a arakõi, 22 jasypoapýpe, 10:00 aravo guive, tembipuru pyahu rupive. Araapýpe, Biblioteca y Archivo Central del Congreso Nacional kotýpe, 10:00 aravo guive, oñeguenohẽta kuatia hérava Manual de Rendición de Cuentas al Ciudadano, oñembohasava’ekue guaraníme.

Oikoháicha voi jepi, aty tuichavéva oikóta 25 jasypoapýpe, Guarani Ñe’ẽ Árape, upépe oñembojopóita Rohayhu Che Ñe’ẽ rupive heta ñande rapichápe oipuru ha omoherakuã porãva guarani ñe’ẽ opa hendarupigua. Ko aty oikóta avei Biblioteca y Archivo Central del Congreso Nacional kotýpe, 10:00 aravo guive.

Oñembosako’i avei hetaiterei ambue aty, taha’e amandaje, ñomongeta, arandu ñehesa’ỹijo, ha hetaiteve, guarani ñe’ẽ, ijepuru, tuicha mba’eha, ha ijegueroike heta hendárupi rehegua. Avei, tapicha arandu ha katupyry ohechaukáta imba’ekuaapy guarani ñe’ẽ ha iñarandupy rehegua.

Jepiveguáicha jepi, ko ñehenói guasu Rohayhu Che Ñe’ẽ oipytyvõ hetaiterei tetã remimoĩmby ha ipypegua’ỹvakuéra, tetãpy tuichakue javeve. Opa umi mba’e ojejapóva, iñasãi avei, ha heta ambue mba’e voi katu ojejapo okaha rehe, ñane retãpýpe, guarani rehehápe.

Compartir esta noticia

Últimas Noticias Publicadas