Logotipo.png
Oñemoarandu guaraníme tesãirã mba’apoharakuéra
Publicado: 10/13/21 11:09:a. m.

Ko ararundy pyharevépe oñepyrũ mbo’esyry hérava “Curso de Expresión Escrita en Lengua Guaraní” oñekuave’ẽva Tesãi ha Tekoporãverã Motenondeha mba’apoharakuérape. Oñembosako’i ko mbo’esyry hi’ãgui ko temimoĩmby mba’apoharakuéra oipuru hekópe ko ñe’ẽ, ko’ýte oñomongetátavo opa umi ñane retãygua oñembojáva hendapekuéra oikotevẽgui.

Ko mbo’esyry rupive hi’ã avei mayma mba’apohára oñemoarandúva oipurukuaa ñe’ẽ ha ñe’ẽjoajukuéra, taha’e oñe’ẽ térã ohaítavo. Ha tove tohechakuaa hikuái tuicha mba’eha oipurukuaa ha oipuru porã guarani ñe’ẽ oñomongeta hag̃ua hekopete mayma oñembojáva ko temimoĩmbýpe ndive.

Ko mbo’esyry hérava “Curso de Expresión Escrita en Lengua Guaraní”, ojejapóva tembipurupyahu rupive, ojepysóta 50 aravo pukukue. Oñehesa’ỹijóta oñeg̃uahẽ porãve hag̃ua oñeñe’ẽnguévo térã ojehaikuévo guaraníme.

Ohesa’ỹijo oñondive Paraguái Ñe’ẽnguéra Sãmbyhyha (PÑS) ha Guarani Ñe’ẽ Rerekuapavẽ (GÑR). Mbo’ehára ramo oĩ Carlos Ferreira, GÑR yta; Rossana Arias, Dpto. de Promoción y Protección de la Diversidad Lingüística moakãhára, ha Christian Ojeda, Dpto. de Gestión de Políticas Lingüística moakãhára, mokõivéva PÑS pegua.

Ko mbo’esyry ñemoñepyrũ omoirũ Paraguái Ñe’ẽnguéra Sãmbyhyhára, Ladislaa Alcaraz de Silvero, ha Ñe’ẽ Rape’apo Moakaharapavẽ PÑS pegua, Celia Godoy.

Léi 4251/10 Ñe’ẽnguéra Reheguápe he’i mayma Paraguáipe oikóva oguerekoha derécho ramo oñemomarandúvo ha oñeñangarekóvo hesekuéra Estado guive mokõive tetã ñe’ẽ teépe, guarani ha castellano. Ko derécho ñembojerovia ningo tuichaiterei mba’e tesãirã guive, tuichaite mba’égui oñoikumby porã mba’apohára ha tapicha ojáva hendápe.

Compartir esta noticia

Últimas Noticias Publicadas