Logotipo.png
Osẽta aranduka guarani-gallego ñe’ẽme “Rosalía ñe’ẽ poravopyre”
Publicado: 06/27/22 06:56:a. m.

Ko arapópe, 30 jasypoteĩme, oñeguenohẽta Centro Cultural de España Juan de Salazar-pe aranduka iñe’ẽkõíva, guarani-gallego, hérava “Rosalía ñe’ẽ poravopyre” (Escolma poética de Rosalía), omono’õva ñe’ẽyvoty haihára Galicia-gua Rosalía de Castro mba’éva, ha omoguaraniva’ekue Susy Delgado.

Ko aranduka ñeguenohẽ oipytyvõ CCEJS ha ombokuatia Arandurã. Omoirũta ko aty umi ojepytasova’ekue osẽ hag̃ua ko aranduka, avei kuñakarai katupyryete Delicia Villagra ha haihára Javier Viveros.

Ko aranduka “Rosalía ñe’ẽ poravopyre” (Escolma poética de Rosalía) omoneĩ de Interés Cultural-ramo Tetã Arandupy Sãmbyhyha, ha de Interés Lingüístico-ramo Paraguái Ñe’ẽnguéra Sãmbyhyha, ha oipytyvõ Guarani Ñe’ẽ Rerekuapavẽ. Iñeguenohẽ oykeko avei Universidad de Vigo ha Fundación Rosalía de Castro, Galicia-gua.

Susy Delgado oiporavo umi ñe’ẽyvoty “Follas novas”-gui, aranduka rypy’ũve oguerekóva ko haihára Galicia-gua, he’iháicha umi tapicha aranduete, upéicha ogueroikepaite umi oĩva “Vaguedás”-pe ha avei oguenohẽ “Do íntimo”-gui. Ko aranduka omoñe’ẽñepyrũ Iolanda Galanes, ha avei Susy Delgado.

“Rosalía ñe’ẽ poravopyre” (Escolma poética de Rosalía) poháma ñe’ẽyvoty’aty oguenohẽva mokõi ñe’ẽme Susy Delgado, omoirũ avei ambue tapichápe heta ambue aranduka apo peichagua. Oñembojopoiva’ekue Susy-pe upe 2017 arýpe Premio Nacional de Literatura rupive.

Compartir esta noticia

Últimas Noticias Publicadas