Logotipo.png
Paraguái ñe’ẽyvoty oñehendúta Medellín-pe
Publicado: 08/03/21 09:35:a. m.

“Aguyguy, aheka/ pe yvy. (…) mamópoku oime/ pe yvy/ yvy marae’ỹ./ Tatatĩ poku / oime/ oñomi. [Deambulo buscando/ esa tierra. (…) Dónde estará/ esa tierra,/ la tierra sin mal./¿Será que la niebla/ la cubre?]”. Péicha he’i peteĩ Feliciano Acosta ñe’ẽyvoty, ñe’ẽpapára oĩtava Paraguái rérape 31º Festival Internacional de Poesía de Medellín-pe, peteĩ mesa jerépe oñeñpyrũtahápe oñemoñe’ẽ ko’ẽrõ, 4 jasypoapýpe, aty oikéva avei opa umi ojejapóva apytépe, oñepyrũmavakuri upe arateĩ ohasava’ekuépe ha ojepysótava ko jasy paha rupi peve. Ko aty oikóta 16:00 ramo Colombia-pe, ha Paraguáipe 17:00 guive.

Feliciano Acosta.

Ko ñe’ẽpapára paraguaigua, hapykuere rypy’ũ ha pukúmava, oĩta ko mesápe heta ambue América ñe’ẽnguéra ha iñarandupykuéra rérape oĩtava ndive: Pedro Ortiz, inga arandupy rérepe, Colombia guive; Juana Peñate Montejo, chol arandupy rérape, México guive; Roxana Miranda Rupailaf, mapuche arandupy rérape, Chile guive; Manuel Bolom Pale, tsotsil arandupy rérape, México guive.

Feliciano Acosta ningo ñe’ẽpapára, haihára, ñe’ẽasahára, aranduka’apohára, hapykuerepukúmava, ha omba’apove guarani rehe ha ñe’ẽyvoty apópe. Guarani Ñe’ẽ Rerekuarapevẽ, omoakãva’ekue Sociedad de Escritores del Paraguay ha oĩ PEN Club del Paraguay-pe. Oguerojerava’ekue Clubdelibros Paraguay. Oisãmbyhyva’ekue ojeikuaaitemíva revista Ñemitỹ. 50 rasáma oguenohẽ aranduka ha hetáma oñembojopói.

Ko Festival de Poesía de Medellín ko arýpe omono’õ 185 ñe’ẽpapára oñe’ẽyvoty rendukátava hetaite tetã rérape ha hetaiterei ñe’ẽme. Ñe’ẽpapára ojekuaavéva castellano pegua oĩtava avei ningo Antonio Gamoneda, España guive, ha Raúl Zurita, Chile guive.

Ary ohasava’ekuépe heta ñe’ẽpapára katupyrýma Paraguái rérape oĩ ko aty guasúpe, ãva apytépe oĩ Mario Casartelli, Jacobo Rauskin, Gladys Carmagnola, Gregorio Gómez Centurión, Carlos Villagra Marsal, Shirley Villalba, Alba Eiragi, Mónica Laneri ha Susy Delgado.

Ko aty guasúpe oikóva, ñe’ẽyvoty ñemoñe’ẽ ha ambueve mba’e, ikatúta ojehecha Facebook rupive: festivalpoesiamed; a avei YouTube.revistaprometeo rupive.

Compartir esta noticia

Últimas Noticias Publicadas