Logotipo.png
​PÑS ha INC omboheraguapy ñoñe’ẽme’ẽ
Publicado: 09/19/22 10:21:a. m.

Ko arakõime, Paraguái Ñe’ẽnguéra Sãmbyhyha (PÑS) ha Industria Nacional del Cemento (INC) omboheraguapy ñoñe’ẽme’ẽ omba’apo joajuve hag̃ua heta apopyrãme omombaretévo guarani ñe’ẽ -ayvu ha ijehaípe- ñe’ẽ teeháicha, ha avei ypykuéra ñe’ẽita ñeñongatu ha ñemoasãime.

PÑS sãmbyhyhára, Ladislaa Alcaraz de Silvero, ha INC moakãhára, Ernesto Julián Benítez Petters, omboheraguapy ko ñoñe’ẽme’ẽ kuatia, ha péicha ikatúta ogueroguatave ohóvo oñondive heta tembiapo ko’ã tetã remimoĩmby mokõive.

Ko kuatia ñemboheraguapy rupive ojegueroguatase opaichagua tembiapo joaju oñeikotevẽva ikatu hag̃uáicha ombohape oñondive tembiapoita ha apopyrãnguéra, upéicha avei tekotevẽmby ouporãva mokõive temimoĩmbýpe, ha oñemotenondevéta umi ypykuéra ñe’ẽ ñeñongatu ha ñemyasãirã, ha upéicha toñemombareteve mokõive Paraguái ñe’ẽ tee ha ñe’ẽeta oĩva tetãpýre.

Oñeñeha’ãta avei ojehetejora apopyrãnguéra ikatúva omombarete ava aty ha iñe’ẽ tee reko; avei, oñopytyvõta PÑS ha INC ikatumihápe ha ikatumiháicha, ogueroguatávo joajúpe tembiapoita.

PÑS guive, omoirũ sãmbyhyhárape Ypykuéra Ñe’ẽita Ñeñongatu ha Ñemoasãi moakãharapavẽ, Rossana Bogado de Orué; Ñe’ẽ Rapereka moakãharapavẽ, Celeste Fleitas Girland; Gabinete moakãhára, María Benigna Alvarenga de Sánchez; Tecnologías de la Información y Comunicación moakãhára, Raúl Felipe Galeano Jiménez.

Omoirũ avei ko aty, Dpto. de Promoción y Protección de la Diversidad Lingüística moakãhára, Rossana Arias; Dpto. de Gestión de Políticas Lingüísticas moakãhára, Christian Ojeda, ha Dpto. de Relaciones Interinstitucionales moakãhára, Saturnina Díaz Molinas.

Compartir esta noticia

Últimas Noticias Publicadas