Logotipo.png
PÑS ha UNC omboheraguapy ñoñe’ẽme’ẽ
Publicado: 08/04/22 04:17:a. m.

Paraguái Ñe’ẽnguéra Sãmbyhyha (PÑS) ha Concepción-gua Tetã Mbo’ehaovusu (Universidad Nacional de Concepción, UNC) omboheraguapy ko ararundýpe ñoñe’ẽme’ẽ ha he’i ojupe péicha ogueroguataseha tembiapoita ha apopyrãnguéra guarani ñe’ẽ jeporu ayvu ha jehaípe oñemomba’eguasu, ojehecha ha ojeporumeme hag̃ua, tetã ñe’ẽ teeháicha; upéichante avei ojehapereka hag̃ua ñe’ẽnguéra ojeikuaave potávo opaite mba’e ñe’ẽita, tekojoparaeta, tekotee ha tetã pokatupavẽ rehegua.

PÑS sãmbyhyhára, Ladislaa Alcaraz de Silvero, ha UNC moakãhára, Clarito Rojas, omboheraguapy ko kuatia, PÑS rógape, Paraguay távape. Omoirũ chupekuéra PÑS guive, Ñe’ẽ Rape’apo moakãharapavẽ, Celia Godoy, ha Ñe’ẽ Rapereka moakãharapavẽ, Celeste Fleitas Girland.

Oĩ avei PÑS pytyvõharapavẽ, Pablo César Salinas; Planificación Estratégica y Evaluación Institucional moakãhára, Carlos Garay, ha Departamento de Enlaces Interinstitucionales moakãhára, Saturnina Díaz. UNC rérape omoirũ avei imoakãhárape Froilán García, Gabinete pytyvõhára.

Oñemboheraguapypa rire ko kuatia, sãmbyhyhára Ladislaa ohecharamo ñe’ẽ rehe ñemba’apo ojegueroguatakuaáva UNC ndive, ohechakuaávo tuicha mba’eha mbo’ehaovusu rembiapo. “Son espacios para nosotros para aunar esfuerzos y promover investigaciones lingüísticas, la documentación de las lenguas; promover experiencias de extensión universitaria, y en la docencia ir impregnando también el tratamiento de las lenguas y los derechos lingüísticos”, he’i sãmbyhyhára.

UNC mboakãhára he’i guaraníme tuicha mba’eha ñe’ẽ rehe ñemba’apo ñane retãme. “Heta la tembiapo ha la tembiaporã hetavéntema. Ko’ág̃a ñañe’ẽta formación educativa rehe ha upépe opyrũjey hatã la política lingüística”, he’i Clarito Rojas.

Ko ñoñe’ẽme’ẽ omboheraguapýva PÑS ha UNC rupive, mokõivéva he’i ojupe ogueroguataseha joajúpe heta apopyrã ñe’ẽnguéra rehegua, ko’ýte oykekóva guarani ha ypykuéra ñe’ẽita rehehápe.

Compartir esta noticia

Últimas Noticias Publicadas