Paraguái Ñe’ẽnguéra Sãmbyhyha (PÑS) ombojopóita 22 tapichápe heta hendárupi ohyvykói kyre’ỹva hembiapópe español ñe’ẽ Paraguáipe. Ko aty oikóta ko arapoteĩ oúvape, 29 jasyrundy, 10:00 aravo guive, Biblioteca ha Archivo Central del Congreso Nacional kotýpe (Avda. República y 15 de Agosto) Paraguay távape.

Mokõi aryhápe ojohapykuéra ombosako’i PÑS ko aty jehechakuaarã, ombojoajúvo avei Español Ñe’ẽ Ára Yvy Ape Ári reve, ojegueromandu’ava’ekue ope 23 jasyrundy ohasava’ekuépe, ohechakuaa ha omokyre’ỹségui umi ñande rapicha ohyvykóiva akóinte peteĩva umi mokõive ñane retã ñe’ẽ tee apytégui, ha’éva español.

Oñembojopóita hembiapoita rehe ha oykeko kyre’ỹ rehe español ñe’ẽme jehai, jeporeka, ñemoasãi, jehekombo’e ha ambueve ko ñane retã Paraguáipe, ko’ã ñande rapicha katupyry:

Juan Evangelista Aguiar Benítez, María Isabel Barreto de Ramírez, Estela Appleyard de Acuña, Guido Rodríguez Alcalá, Esther González Palacios, Pablina Escobar de Rivas, Maxdonia Fernández, Blásida Costa Viveros, Emina Nasser de Natalizia (Póstumo), Mirtha Piris Da Motta (Póstumo), Raquel Chaves, Alberto Muñoz, María del Carmen Benítez Florentín, Teresa González Ramos de Benítez, Aisnalia González de Arévalos, Aida Ortiz de Coronel, Alfredo Méndez García, María Estela Asilvera, María Luz Saldívar Bogado, Juana Dávalos Arce, Estela Mary Peralta de Aguayo ha Stella Mary Vallejo de Gómez.

Iporã ojekuaa ojeporavo hag̃ua opa umi ojehechakuaátava, PÑS ojerure ha ohendu heta temimoĩmbýpe, taha’e mbo’ehaovusu, centro culturale, aranduka apoharakuéra, embajada, ñe’ẽ rerekuára, ha ambueve, ha’ekuéra omog̃uahẽ herakuéra ha he’i mba’e rehepa iporãne ojehechakuaa chupekuéra.

Ko aty guasu oikótava omoakãta Paraguái Ñe’ẽnguéra Sãmbyhyhára, Ladislaa Alcaraz de Silvero, ha’e ñanepepirũmbaite ñamoirũ hag̃ua ko aty.

---

Últimas Noticias Publicadas