Logotipo.png
PÑS sãmbyhyhára omoirũ amandaje Plan Nacional de Pueblos Indígenas
Publicado: 04/19/22 07:42:a. m.

Paraguái Ñe’ẽnguéra Sãmbyhyhára (PÑS), Ladislaa Alcaraz de Silvero, omoirũ amandaje hérava Avanzando hacia la Implementación del Plan Nacional de Pueblos Indígenas (PNPI) 2020-2030, ombosako’íva Paraguái Ypykuéra Ñangarekoha, ombojoajúvo América Ypykuéra Ára rehe, ojegueromandu’áva ko árape, 19 jasyrundýpe.

Ko aty oiko Sala Bicameral del Congreso Nacional-pe, Paraguay távape, ha omoirũ heta tetã mburuvicha ha tetã ambuegua, avei ypykuéra Paraguái pegua rérape oĩva.

Ko amandaje rupive, ojepysótava 15:00 aravo peve ko árape, hi’ã oñemoasãi ha oñembohape oguata kyre’ỹ hag̃ua ko Plan Nacional de Pueblos Indígenas, oñemoneĩva’ekue Apoukapy Ppy. 5897/2021 rupive.

Oñemoñepyrũ ko aty peteĩ Guarani atygua ñembo’e rupive, ha upéi oñe’ẽ avei ambue ypykuéra herapekuéra. PÑS sãmbyhyhára oñe’ẽ avei ko atýpe tetã rérape ha péina ko temimoĩmby omba’apo kyre’ỹva ypykuéra ñe’ẽita rérape, oñeñongatu, oñemoasãi ha oñemombarete jey hag̃ua.

“La lengua es un instrumento de comunicación y de interacción no solamente entre las personas, en el caso de los pueblos indígenas es también un medio de comunicación con la naturaleza, con un ser trascendente. Upéva rehe tuichaiterei mba’e ko ñane ñe’ẽ”, he’i sãmbyhyhára Ladislaa.

“Estado guive ore romoirũ jahechápa ñañangareko ñane ñe’ẽ rehe. Ñane ñe’ẽ rehe ñañangarekótaramo ndaha’éi ñe’ẽre reínte ñamba’apóva, ñamba’apova’erã iñe’ẽharakuéra ndive”, omombe’u Paraguái ñe’ẽnguéra mburuvicha.

Oñe’ẽ avei Decenio Internacional de las Lenguas Indígenas (DILI) 2022-2032 rehe ha tuicha mba’eha oñembojoajúvo ko PNPI rehe oñemba’apo kyre’ỹ hag̃ua Paraguái ypykuéra ñe’ẽita rehe, ko’ýte umi ikangy ha oguepotáva rehe.

Ko PNPI hi’ã oipuru opa umi tetã remimoĩmby omoañetepaitévo hembiapoteekuéra oykekóvo ypykuérape; avei oipytyvõkuaa ypykuéra atýpe voi, pytagua aty oipytyvõva chupekuéra, aty noĩriva tetãme, temimoĩmby oporohekombo’éva, ha ambueve, ikatu hag̃uáicha joajúpe ha hekopete oñepytyvõ ypykuérape.

Avei, ko kuatia oñemoneĩmava ohechakuaapaite umi ypykuéra aty derécho ojejuhúva Léi Guasúpe, Declaración de las Naciones Unidas, Declaración Americana ha ambueve kuatiápe Paraguái omoneĩpyréva avei ha oykekóva ypykuéra atýpe.


Compartir esta noticia

Últimas Noticias Publicadas