Logotipo.png
PÑS sãmbyhyhára oñe’ẽ Brasil-pe Paraguái ñe’ẽnguéra rehe
Publicado: 02/16/22 11:35:a. m.

Paraguái Ñe’ẽnguéra Sãmbyhyhára (PÑS), Ladislaa Alcaraz de Silvero, ohesa’ỹijo ko ararundýpe imba’ekuaapy Paraguáipe ñe’ẽnguéra rehepa mba’éicha oñemba’apo. Kóva oiko 2ª edición de la Conferencia Internacional de las Lenguas Portuguesa y Española (CILPE 2022) ryepýpe, Brasilia távape, Brasil-pe.

Sãmbyhyhára oñe’ẽ aty’i hérava “Lenguas, cultura, ciencia e innovación. Políticas” ryepýpe, ha omoirũ chupe João Boaventura Ima-Panzo, CPLP moakãhára; Guillermo Escribano Manzano, Español en el Mundo moakãharapavẽ, ha Débora Soares, Ministério da Educação e Cultura, Brasil pegua.

Omombe’u opa umi mba’e oñeñeha’ãva ojejapo Paraguáipe ñe’ẽnguéra rehehápe. Upéva ryepýpe, ohesa’ỹijo mba’éichapa español ha portugués oike heta ambue ñe’ẽ ha arandupy -ko yvy pehẽ meguápe- rekovekuápe; mba’éichapa ko’ẽ rei rehe hetave ipuruharakuéra ko Iberoamérica-pe, ha mba’éichapa ko’ãvape ombohasa heko ha ko’ãva rekópa mba’éicha avei oike ipypekuéra.

Omombe’u mba’emba’épa umi ñe’ẽ ojepuruvéva ñane retãme. Upéva ryepýpe he’i guarani ha’eha ñe’ẽ ojepuruvéva, ko’ýte oñeñe’ẽnguévo; ha español imbareteve haipýpe, tetã rembiapópe, arandupýpe, ha ambueve.

Oñe’ẽvo mba’éichapa oñemba’apo Paraguáipe ñe’ẽnguéra rehe, he’i oñembohapeha imbarete joja hag̃ua mokõivéva tetã ñe’ẽ tee, guarani ha castellano, ha avei oñeñeha’ã oñeñangareko, oñeñongatu ha oñemombarete jey ñane ñe’ẽita aty, omono’õva ypykuéra ñe’ẽita, iñe’ẽngúva ñe’ẽ paraguaigua ha pytaguára ñe’ẽita oikovéva ñane retãme.

PÑS sãmbyhyhára he’i oĩha heta mba’e tekotevẽva ojejapo, ãva apytépe he’i hi’ãha oñemoasãi ñe’ẽ jepuru, ko’ýte tetã rembiapópe. Avei, tove anivéma mokõive ñe’ẽ ojepuruvévante térã pytagua ñe’ẽ añónte oñemomba’e, ha tove toñembojerovia ñane ñe’ẽ ypykuéra, oñeñeha’ãtava akói ojejapo.

Avei, he’i tekotevẽha oñeñangareko tetã rembiapo guive ñe’ẽnguéra derécho rehe, ko’ýte umi tekombo’e, tesãirã, tekojoja, ñemomarandurã, ha ambuevépe.

Kóva ryepýpe, he’i avei umi mba’e tekotevẽva ojapo Paraguái retã oñangareko ha ohechakuaávo opa umi ñe’ẽ ojepurúva ñane retãme, ojeguatávo Léi Guasu, Léi 4251/10, Ñe’ẽnguéra Rehegua, ha ambueve léi ári, ombohapepáva tetã ñe’ẽnguéra rehepa mba’éicha oñeñangarekova’erã Paraguáipe.

Ko amandaje mokõiha CILPE oñepyrũ ko ararundýpe ha ojepysóta ko arapoteĩ meve. Ojapo OEI, ha oipytyvõ Ministerio de Relaciones Exteriores Brasil pegua, tetã ojejapoha. Oipytyvõ avei Comunidad de Países de Lengua Portuguesa (CPLP), Secretaría General Iberoamericana (SEGIB), Instituto Internacional de Lengua Portuguesa (IILP), ha Camões I.P y del Instituto Cervantes.


Compartir esta noticia

Últimas Noticias Publicadas