Logotipo.png
PÑS sãmbyhyhára oñe’ẽ umi ñe’ẽ guarani rehe tetã ambue pegua aty guasúpe
Publicado: 10/22/21 11:02:a. m.

Paraguái Ñe’ẽnguéra Sãmbyhyhára (PÑS), Ladislaa Alcaraz de Silvero, oĩ avei ko arapoteĩ pyharevépe mesápe oñehesa’ỹijohaguépe “Lengua guaraní: políticas lingüísticas y pluricentrismo”. Ko aty oike avei amandaje guasu hérava I Congreso Internacional de Lenguas Pluricéntricas (I PLURI) ryepýpe, ojepysóva mbohapy ára pukukue (20 jasypa guive 22 peve), osẽva Brasil guive internet rupive.

Sãmbyhyhára oñe’ẽ opa umi ñe’ẽ guaraníva ojepurúva Paraguáipe rehe; ko’ãva apytépe oĩ guarani tetã ñe’ẽ teéva, ha opa ñe’ẽ oipurúva umi poteĩ ypykuéra aty oĩva guarani ñe’ẽ rapo ryepýpe (mbya guaraní, paĩ tavyterã, ava guaraní, aché guaraní, guaraní ñandéva ha guaraní occidental).

Oñe’ẽvo ñe’ẽ tee rehe, omombe’u opa umi mba’e ojejapóva temimoĩmby ha’e omyakãva guive jahechápa tove tojepuru meme tetã rembiapópe ko ñe’ẽ; omombe’u opa umi oñemongu’éva joajúpe, ha oñeñeha’ãva ojejapo ojehupytývo ko mba’e. Avei, ohesa’ỹijo opa umi mba’e tekotevẽva ohupyty guarani oñemohendapávo ko ñe’ẽ ha oguatávo ijehegui ijepuru añete ha ipuru meme opa hendárupi.

Oñe’ẽvo umi guarani ypykuéra oipuruvéva rehe, sãmbyhyhára omombe’u mamoitépa ojejuhu peteĩteĩva ko’ãva, ikandýpa térãpa imbarete, umi ohupytýva ohóvo hikuái ha mba’emba’épa umi ikatúva ohekojopy chupekuéra.

Heta tapicha iñarandúva ñe’ẽnguéra rehegua kuaapýpe, I PLURI rupive hi’ã ojejepy’amongeta opa umi mba’e omboheko ha ohetejorakuaáva ñe’ẽnguérape, ojejehechakuaapávo opa mba’e oikéva ipype: ñe’ẽkuaapy, ava’aty, arandupy ha política.

Ko I PLURI ojejapo joajúpe Universidad Federal de Santa Catarina (UFSC), Universidad Federal de Bahía (UFBA), Universidad Federal Fluminense (UFF) ha Universidad de Brasilia (UnB), UNOESTE, la Universidad Federal de Roraima (UFRR), Instituto de Investigación y Desarrollo en Políticas Lingüísticas (IPOL), temimoĩmbykuéra oikéva Brasil pegua Cátedra UNESCO de Políticas Lingüísticas para el Multilingüismo mboja’opýpe, oĩva UFSC-pe.

Compartir esta noticia

Últimas Noticias Publicadas