Logotipo.png
ROHAYHU CHE ÑE’Ẽ: ÑEMOMORÃ GUASU OHENÓIVA MAYMA PARAGUAIGUÁPE OIKOVE HAG̃UA GUARANÍME
Publicado: 08/18/16 08:08:a. m.

Paraguái Ñe’ẽnguéra Sãmbyhyha, mbohapy aryháma, ombosako’i ñemomorã guasu hérava “Rohayhu che ñe’ẽ. Una semana en lengua guaraní”, ohenóiva mayma Paraguiguápe oikove hag̃ua guaraníme ha guarani ndive peteĩ arapokõindy pukukue. Ko aponde’a rupive oñeñeha’ã oñemoasãi ha oñemombareteve guarani jeporu meme ayvu ha haipýpe mamo hendápe ha opa mba’erã, tove upéicha tañande aguarave heseve ko’ẽrei rehe.

Ko ñemomorã guasu ojepysóta 22 jasypoapy guive 27 peve, ojegueromandu’ávo avei tavarandu, guarani ñe’ẽ ha guarania ára. Heta hendáicha oñemomorãta guarani arapokõindy, taha’e vy’aguasu, amandaje, aty ha tembiapo ñe’ẽ ñemomba’everã, ha hetaiteve hendáicha, ombyatýtava mitã, mitãrusu ha kakuaa Paraguaiguápe, oikóva ñande yvýpe ha tetã ambue rehe.

Guarani arapokõindy ñemomorã guasu “Rohayhu che ñe’ẽ” oñepyrũta ág̃a arakõi 22 jasypoapy ramo 10:00 aravo jave, Centro Paraguayo de Educación Permanente “Ko’ẽ Pyahu” (PRODEPA) rógape, opytáva Avda. Eusebio Ayala km. 4 y 1/5 rapépe. Omoirũta heta Motenondehára ha Sãmbyhyhára Poder Ejecutivo pegua ha mburuvicha heta ambue temimoĩmby pegua.

Ojojaite oñemoñepyrũta avei guarani arapokõindy ñemomorã guasu opa 17 departamento javeve Secretaría de Educación, Gobernación kuéra guive; 41 Instituto de Formación Docente de Gestión Oficial; ha Coordinación de Supervisiones Educativas guive, tetãpy tuichakue javeve.

Upe arakõime 14:00 aravo jave, Ministerio Público rógape (Chile ha Jejúi), oñeguenohẽta peteĩ revista jurídica ohechaukáva guarani jeporu ko temimoĩmbýpe. Ko aty oñembosako’i Paraguái Ñe’ẽnguéra Sãmbyhyha ndive.

Guarani arapokõindy ñemomorã guasu ojepysóta arapokõi 27 jasypoapy peve ha ijapytépe ojejapópa: cine-debate heta mbo’ehaópe; heta tapicha ha temimoĩmbýpe ojehechakuaáta akóinte ojepytasóva guarani jeporu ha ñemoasãi rérape; aty ñomongeta guarani rehe; ñoha’ang̃a; ha hetaiteve. Ipahávo, ág̃a arapokõi ramo 09:00 aravo guive, oñehenói opa mitã, mitãrusu ha kakuaápe, oguata hag̃ua tape Palma re ha tove vy’apópe taja’e oñondivepa: “Rohayhu che ñe’ẽ”.

Guarani ñe’ẽ ñemomorã guasu “Rohayhu che ñe’ẽ. Una semana en lengua guaraní” ñembosako’i oykeko mbarete umi 17 Gobernaciones Departamentales, Municipales ha Secretaría de Educación; umi 17 Coodinaciones Departamentales ha Supervisiones Educativas; mayma 41 Instituto de Formación Docente de Gestión Oficial; umi 41 temimoĩmby Estado pegua ha Estado pegua’ỹva; ha maymavaite ambue temimoĩmby temkombo’e ryepy pegua.

Compartir esta noticia

Últimas Noticias Publicadas