Logotipo.png
​Sãmbyhyhára oikuaauka PÑS rembiapokue 2021 arýpe guare
Publicado: 03/31/22 11:43:a. m.

Paraguái Ñe’ẽnguéra Sãmbyhyhára (PÑS), Ladislaa Alcaraz de Silvero, oikuaauka ko arapópe PÑS Rembiapo Momarandu ha Rembiapo Jehechauka 2021 arýpe guare, ha péicha omoañete umi léi he’ihápe kóicha ojejapova’erãha ha avei oipykúivo jepiveguáicha tesakãme ha og̃uahẽhápe maymávape.

Ko aty oñemog̃uahẽhaguépe PÑS Rembiapo Momarandu ha Rembiapo Jehechauka 2021 arýpe guare oiko Biblioteca ha Archivo Nacional kotýpe, Paraguy távape, ha iñasãi avei PÑS Facebook Live rupive. Heta ambue tetã ha pytagua mburuvicha omoirũ ko aty.

Ko temimoĩmby rembiapoteéva ryepýpe, sãmbyhyhára omombe’u heta oñemba’apohague guarani ojepuru kyre’ỹ hag̃ua tetã rembiapópe, kóva oñeñeha’ãve ojegueroguata Unidad de Asuntos Lingüísticos (UAL) kuéra ndive; avei, PÑS guive oñemoguarani, castellano-gui, 561 kuatia rogue hetaiterei temimoĩmbýpe g̃uarã.

Ko tembiapokuépe oñemombe’u avei ojehechakuaahague hetaiterei ñande rapichápe omoherakuã porã rehe ñane ñe’ẽnguéra, ko’ãva apytépe oĩ guarani, castellano, ypykuéra ñe’ẽita ha iñe’ẽngúva ñe’ẽ.

Hetaiterei haty rupive oñehesa’ỹijo kuaapy opaichagua ñe’ẽ rehe ñañe’eramo, upéichante avei ojeporohekombo’e ojepuru porã hag̃ua guarani ñe’ẽ, ko’ãva aty omoakã PÑS ikatu hag̃uáicha ojeykeko temimoĩmbykuérape ñane retãpy rehe.

2021 arýpe osẽ avei kuri peteĩ mba’e neporãva, ha’éva app Guarani Ayvu, ñe’ẽryru oĩva mbohapy ñe’ẽme (guarani-castellano-inglés), mba’e guasúva guarani rekovépe g̃uarã ogueroikére ko ñe’ẽme tembipurupyahukuéra kuápe ha ojehechaporãitemi rehe, upéicha rupi 61.000 rasáma omboguejýma, Paraguay, Argentina, Brasil, Bolivia, España, EEUU ha Alemania guive.

Iñe’ẽngúva ñe’ẽ apytépe, Subcomisión de Información, Comunicación y Lengua de Señas, omoakãva PÑS, guive oñombyatypa hikuái 3 jey ha 4 atýpe oñemono’õ omba’apo hag̃ua jahechápa ndojegueroikevéi iñe’ẽnguéra mamo hendápe ha tove toñemomba’eve iderechokuéra.

Ypykuéra ñe’ẽ rehe ñemba’apo apytépe oĩ akóinte oñeñongatu, oñemoasãi ha oñemombarete jeývo chupekuéra iñe’ẽ. Opa ko’ã tembiapo oike ypykuéra ñe’ẽ ikangyetémava ñeñongatu apytépe, ha’éva: guaná, avá guaraní, sanapaná, angaité, tomárãho ha manjui.

Omombe’u avei ñe’ẽrapereka ojegueroguatáva PÑS guive; upéva ryepýpe, he’i oñemba’apohahína tendakuéra réra rehe, taha’e tavusu, táva, ykuéra ha tava’i rerekuéra rehe, ojejapóva joajúpe Dirección del Servicio Geográfico Militar ndive, oĩva Ministerio de Defensa Nacional ryepýpe.

Ko tembiapokue ohechauka avei mba’éichapa oñemomarandu PÑS guive mokõive ñe’ẽ teépe opaite umi tembipurupyahu rupive; ñoñe’ẽme’ẽ heta temimoĩmby ndive oñemba’apo joajúvo. Avei, opa mba’e oñemongu’éva temimoĩmby ryepy guive oñeñeha’ãvo ojeguata porãve, tapekarẽ’ỹme, ha ojejapóvo hekopete tembiapoita.

Ko’ãva ha hetave mba’e oñemombe’u ko kuatiápe ohechaukáva PÑS rembiapokue, ikatúva oñemoñe’ẽmbaite ojehesakutúvo ko’ápe: PÑS Rembiapo Momarandu ha Rembiapo Jehechauka 2021 arýpe guare.


Compartir esta noticia

Últimas Noticias Publicadas