Logotipo.png
​Villeta Tavao ha PÑS he’i ojupe kuatia rupive omba’apojoajutaha
Publicado: 08/03/22 09:35:a. m.

Hi’ãgui joajúpe omboguata apopyrãnguéra oipytyvõtava guarani ñe’ẽ oñemomba’eguasu, ojehecha ha ojeporumeme hag̃ua ayvu ha jehaípe ko Villeta távape, Paraguái Ñe’ẽnguéra Sãmbyhyha (PÑS) ha Villeta Tavao omboheraguapy ñoñe’ẽme’ẽ ko ararundýpe ha he’i ojupe péicha ogueroguataseha oñondive tembiapoita.

Ko aty, oikva’ekue Plaza de los Héroes-pe, Villeta távape, omoakã PÑS sãmbyhyhára, Ladislaa Alcaraz de Silvero, ha Villeta Tavao moakãhára, Teodosio Romilio Gómez Ibáñez. Mokõive mburuvicha omboheraguapy ko ñoñe’ẽme’ẽ kuatia.

PÑS sãmbyhyhára omomba’e guasu umi tembiapo joajúpe oñemongu’eséva, ikatu hag̃uáicha oñemoañete Léi 4251/10, Ñe’ẽnguéra Rehegua, omomba’e guasu jojáva mokõive ñane retã ñe’ẽ tee, guarani ha castellano; ha avei, oñangarekóva opaite ñe’ẽ deréchore ha ñande reko joparaeta ha ñe’ẽita rehe.

“Hi’ã ningo oréve ñamombarete ñane ñe’ẽnguéra, mokõive ñande Estado ñe’ẽ tee, castellano ha guaraní. Nahi’ãvéima ñamboyke térã ñañongatu ko ñane ñe’ẽ guaraní, anivéma ñaguerotĩ, jahechauka mayma ñane rembiapoha rupi iporãha ko ñane ñe’ẽ”, he’i sãmbyhyhára.

Upe rire, he’i mitãrusukuérape ipopekuéra oĩha ñamombaretévo ñane ñe’enguéra. “Jóvenes, maestros, estemos juntos en este tiempo para promover el uso de nuestras lenguas oficiales; todos estamos implicados a gestionar las lenguas del Paraguay”, he’i Ladislaa.

Oñemboheraguapypa rire ko ñoñe’ẽ, oisãmbyhy ko atýpe peteĩ amandaje karai Villeta-gua Gregorio Gómez Centurión, haihára ha tembikuaahára katupyry. Upéi, Catalino Recalde, oisãmbyhýva Unidad de Asuntos Lingüísticos (AUL) Industria Nacional del Cemento (INC)-pe, ohesa’ỹijo haipy “Tetãygua pyambu”.

Péina péicha PÑS ha Villeta Tavao oñepyrũtama ogueroguata apopyrãnguéra oykekótava ñane ñe’ẽnguérape, mamo hendárupi ha opa mba’erã ko Villeta tavapýre.





Compartir esta noticia

Últimas Noticias Publicadas